Bir dáriger osyndaı hıkaıa aıtady dep jazady Qamshy aqparattyq agenttigi mazhab.kz-ke silteme jasaı otyryp. 
Kabınetime tekserilý úshin shamamen alpys jastaǵy jasy úlken apa men otyz jastaǵy jigit kirip keldi. Jigittiń kempirge bolǵan óte jyly qarym-qatynasy meniń nazarymdy tartty. Óıtkeni ol kempirdiń qolyn ustap jáne ústindegi jamylǵysyn túzetip qoıady. Qolymen tamaq pen sý berdi. Kempirdiń jaǵdaıyn surap, qajetti qaǵazdaryn alyp kelýdi aıtqanymnan soń, jigitten kempirdiń sana-sezimi týraly suradym. Sebebi kempirdiń áreketteri, bergen jaýaptary birtúrli edi. Erkek bylaı dep jaýap berdi: 
- Ol týylǵannan beri osylaı. Sana-sezimi jetilmeı qalyp qoıǵan. Tańdanyp: 
- Ony kim baǵady?- dep suradym. 
Jigit: 
- Men,- dedi. 
- Solaıma? Onyń kıimderi men denesin kim taza ustaıdy?- dedim. 
- Ony monshaǵa men alyp kirip, kıimderin ilip qoıamyn. Sosyn shomylyp bolǵansha kútip turamyn. Kir kıimderin jýyp beremin jáne qalaǵan kıimderin satyp áperemin,- dep jaýap berdi jigit. 
- Nege oǵan qaraıtyn bir qyzmetshi áıel almaısyz?- dedim. 
Ol: 
- Óıtkeni baıǵus anam balalarǵa uqsap aryz aıtýdy bilmeıdi. Sol úshin qyzmetshiniń anama zábir kórsetip, kóńilin aýyrtýynan qorqamyn! 
- Siz úılengensizbe? 
- Ia álhamdýlıllah! Perzentterim de bar. 
- Olaı bolsa anańyzǵa jubaıyńyz qaraıdy eken ǵoı? 
- Ol da qolynan kelgeninshe qamqorlyq tanytady. Tamaǵyn pisirip, ishkizip-jegizedi. Anama járdem berý úshin áıelime qyzmetshi áıel de jaldaǵanmyn. Biraq men ózim anam men tamaqtanýdy jaqsy kóremin. Sebebi onyń qant dıabeti bar. 
Onyń sózderin estip tań qalyp jáne kózimniń jastaryn áreń ustap turdym. Sol kezde kempirdiń qolyndaǵy tyrnaqtarynyń alynǵanyn da baıqap qaldym jáne: 
- Onyń tyrnaqtaryn kim alady?- dedim. 
- Dáriger hanym, onyń tyrnaqtaryn ózim alamyn. Ózi tyrnaq alýdy bilmeıdi, - dep jaýap berdi uly. 
Kempir ulyna qarap: 
- Maǵan qashan kartop satyp alasyń?- dep qaldy. 
- Qazir, anashym! Ózińizdi dúkenge alyp baramyn!- dedi uly. 
Ana sol kezde balasha qýanyp: 
- Qazir baramyz! Qazir baramyz!- dep jiberdi. 
Uly maǵan qarap: 
- Anamnyń mundaı qýanyshyn kenje ulymnyń qýanyshynan da abzal kóremin!- dedi súısinip. 
Men qatty áserlengenimdi sezdirmeý úshin onyń medısınalyq kartochkasyn paraqtaı bastadym. Sosyn: 
- Onyń sizden basqa jaqyny barma?- dep suradym. 
- Men onyń jalǵyz ulymyn. Óıtkeni ákem úılengeninen soń bir aı ótip anammen ajyrasqan eken,- dep jaýap berdi. 
- Olaı bolsa sizdi ákeńiz tárbıelegen bolar? 
- Joq, maǵan jáne anama naǵashy ájem qaraǵan jáne men 10 jasqa tolǵanymda ol kisi dúnıe salǵan. Alla ony raqymyna alsyn! 
- Siz aýyrǵan kezderińizde anańyz qaraǵanba? Onyń sizge bir ret bolsa da analyq meıirim berip, qaraǵan kezi boldyma? 
Basqasha aıtsaq: Qýanyshyńyz ben qaıǵyńyzǵa ortaq boldyma? 
- Joq dáriger hanym. Sol on jasymnan beri biletinim, anam osyndaı aqyly azaıyp, múgedek. Sol kezden bastap men onyń qoly men aıaǵy boldym. Basyna birer páleket kelmesin dep qorqamyn. 
Men ary qaraı olarǵa dáriler tizimin jazyp, qalaı qoldanatyndaryn túsindirdim. Uly anasynyń qolynan ustady da: 
- Mine endi dúkenge baramyz,- dedi. 
Kempir: - Mekkege barmaımyzba?- dedi. 
Tańdandym jáne: 
- Ony Mekkege qalaı alyp barasyz?- dedim. 
- Ushaqpen!- dedi. 
- Rasymen alyp barasyzba? 
- Árıne. 
- Anańyz ýmra jasamasa da bolady ǵoı. Nege ony ýmraǵa alyp baryp, ózińizdi qınaısyz? 
- Bálkim ýmraǵa alyp barsam anam súıiner. Bul men úshin álemderdiń Rabbysy bolǵan Allanyń quzyrynda jalǵyz qylǵan ýmramnan saýaptyraq bolmaq! 
Olar kabınetimnen shyǵyp ketti. Esikti japtym da medbıkege aldyma eshkimdi kirgizbeýin eskerttim. İshimnen kelgen kóz jasyn tıa almadym. Ózime-ózim bylaı dep sybyrladym: 
- Bul kempir ulyna júkti bolyp, týǵannan basqa analyq qyzmetin de qylmapty. Ne tárbıe bermegen, ne túnderi uıqysyz besik terbetpegen. Qaıǵy-muńyna da ortaq bolmaǵan. Onyń qamyn oılap, keleshegi úshin basta aýyrtpaǵan. Biraq uldaǵy meıirim men qamqorlyqty qara! Káne aıtshy, aqyl-esi jaıynda bolǵan analarymyzǵa myna jigittiń aqyly kemshindeý anasyna qylǵan jaqsylyǵyn qylýdamyz ba? 

Sholýshy: Ásel Óteshova