İs-sharaǵa saıası qýǵyn-súrgin jáne totalıtarızm qurbandarynyń týystary men jaqyndary da qatysyp, Elbasymen áńgimelesti dep habarlaıdy Qamshy aqparattyq agenttigi Aqordaǵa silteme jasap.  

Memleket basshysy rásim aıaqtalǵan soń BAQ ókilderi aldynda sóılegen sózinde búgingi kúnniń Qazaqstan tarıhynda aıryqsha kún ekenin atap ótti.

– 31 mamyrdy biz Saıası qýǵyn-súrgin qurbandaryn jalpyulttyq eske alý kúni retinde atap ótemiz. Bir ǵana Qazaqstannyń ózinde sol jyldary 103 myńnan astam adam tutqyndalyp, onyń 25 myńnan astamy atý jazasyna kesildi. Qazaq zıalylarynyń betke ustar ókilderiniń, respýblıka basshylyǵynyń túgelge jýyǵy joıyldy, – dedi Nursultan Nazarbaev.     

Qazaqstan Prezıdenti el ishinde sol kezde qýǵyn-súrginge ushyraǵan adamdarǵa arnalǵan lagerler salynǵanyn eske salyp, ondaǵy adam tózgisiz jaǵdaılar týraly áńgimeledi. 

– Qazaqstannyń ár túkpirindegi 11 lagerdiń qabyrǵasynda adamdar qınaý men azaptaý saldarynan qaza boldy. Sol lagerlerde mıllıonnan astam adam jazasyn ótedi. Saıası qaıratkerlermen qatar olardyń jubaılary men balalary da qýǵyn-súrginge ushyrady. Keıbir náresteler sol lagerlerde dúnıege keldi, – dedi Memleket basshysy.   

Nursultan Nazarbaev osy aýyr kezeńde Qazaqstan ondaǵan etnos úshin týǵan mekenindeı bolǵanyn, kóptegen qıyndyqty bastan ótkergen olar búginde birtutas halyqqa aınalǵanyn atap ótti.

– Halqymyz osy qaıǵyly oqıǵalardy este saqtaýǵa tıis. Mundaı qasiret qaıtalanbas úshin ony bolashaq urpaq bilýi kerek. Búginde biz quqyqtyq jańa memleket qurdyq. Qazaqstanda azamattardyń quqyqtary men bostandyqtary qorǵalǵan. Bizdiń elde saıası qýdalaýǵa oryn joq. Biz evolúsıalyq damý jolyn tańdadyq, – dedi Qazaqstan Prezıdenti.    

Memleket basshysy bastan ótkergen kezeńderdi Qazaqstan halqy árdaıym este saqtap, búgingi kúnniń qadirine jete bilýi qajettigin aıtty.