Qazaqstan Úkimetiniń Qaýlysymen Ulttyq panteon týraly ereje bekitildi, dep habarlaıdy Qamshy.kz

Qujatqa sáıkes, Ulttyq panteon - memlekettiń, ǵylymnyń, mádenıettiń asa kórnekti qaıratkerleriniń, sondaı-aq Qazaqstannyń damýyna úles qosqan tulǵalardyń esimin máńgi este qaldyrý maqsatynda negizi qalanǵan, memorıaldyq mańyzy bar sáýlet obektisi bolyp tabylatyn qaıtys (qaza) bolǵan tulǵalardy jerleýge arnalǵan oryn.

Panteon astananyń jergilikti atqarýshy organynyń qaramaǵynda, Astana qalasynyń aýmaǵynda ornalasqan.

Panteon aýmaǵynda jerleýge qaıtys (qaza) bolǵan mynadaı tulǵalar jatady:

1) Qazaqstan Respýblıkasynyń prezıdentteri jáne olardyń otbasylarynyń músheleri;

2) Qazaqstan Respýblıkasynyń premer-mınıstrleri jáne olardyń orynbasarlary, Qazaqstan Respýblıkasy Parlamenti palatalarynyń tóraǵalary jáne olardyń orynbasarlary, Qazaqstan Respýblıkasynyń memlekettik hatshylary, Qazaqstan Respýblıkasy Prezıdenti Ákimshiliginiń basshylary, Qazaqstan Respýblıkasy Konstıtýsıalyq Keńesiniń, Qazaqstan Respýblıkasy Joǵarǵy Sotynyń jáne Qazaqstan Respýblıkasy Ulttyq Bankiniń tóraǵalary;

3) mınıstrler, Qazaqstan Respýblıkasynyń Prezıdentine tikeleı baǵynatyn jáne esep beretin memlekettik organdardyń basshylary, oblystardyń, respýblıkalyq mańyzy bar qalanyń, astananyń ákimderi;

4) «Halyq qaharmany», «Qazaqstannyń Eńbek Eri» ataqtaryna ıe bolǵan tulǵalar;

5) «Altyn qyran», «Otan», «Qazaqstan Respýblıkasynyń Tuńǵysh Prezıdenti - Elbasy Nursultan Nazarbaev», úsh dárejeli «Eńbek Dańqy» ordenderimen marapattalǵan azamattar;

6) «Keńes Odaǵynyń Batyry», «Sosıalısik Eńbek Eri» ataqtaryna ıe bolǵan azamattar;

7) «Qazaqstannyń ǵaryshker-ushqyshy» qurmetti ataǵyna ıe bolǵan azamattar;

8) Qazaqstan Respýblıkasy Prezıdentiniń erekshe sheshimi boıynsha basqa da azamattar;

9) Panteonda jerleýge jatatyn tulǵalarmen olardyń keıin qaıtys bolǵan jubaılary jerlenýi múmkin.

Aıta keterligi, qaıtys (qaza) bolǵan tulǵalardy jerleýdi uıymdastyrýdy qaıtys (qaza) bolǵan adamnyń jubaıynyń, jaqyn týysqandarynyń ne zańdy ókiliniń bastamasymen oblystardyń, respýblıkalyq mańyzy bar qalanyń jáne astananyń jergilikti atqarýshy organdary júrgizedi.

Jerleý týraly sheshim qabyldaý kezinde qaıtys (qaza) bolǵannyń erki nemese jubaıynyń, jaqyn týystarynyń ne qaıtys (qaza) bolǵannyń zańdy ókiliniń tilegi eskeriledi.

Panteonda qulpytas qurylystaryn ornatý jáne bezendirý biryńǵaı nysanda oryndalady.

Óz erkimen jerleý, januıalyq (rýlyq) zırat qurý jáne qaıta jerleý Panteonda júrgizilmeıdi.

Osy qaýly alǵashqy resmı jarıalanǵan kúninen keıin kúntizbelik on kún ótken soń qoldanysqa engiziledi.

Eske salsaq buǵan deıin ulttyq panteonǵa Oral Muhamedjanov, Farıza Ońǵarsynova, Sergeı Dáchenko, Ábish Kekilbaıuly, Maqsut Nárikbaev, Qozy-Kórpesh Jańbyrshın sıaqty tulǵalar jerlengen.