Shetelde turatyn qazaqstandyqtar kóp. Olardyń biri elge qaıta oralsa, endi biri sol elde qalady. Shetelde alǵan bilimi men tájirıbesin Qazaqstannyń damýy jolynda aıanbaı eńbek etý úshin qaıta oralatyndar da kóp. Qamshy aqparattyq agenttigi weproject.kz-ke silteme jasap shetelde turyp jatqan 3 qazaqstandyqtyń qazirgi ómiri men elden nelikten ketýge bel býǵany týraly jazbany nazarlaryńyzǵa usynady.
Aıgúl Joldasova
38 jasta Project Costcontroller (ekonomıs), týǵan jeri – Atyraý, qazir Norvegıanyń Oslo qalasynda 2007 jyldan beri turady
Men 10 jyl buryn Qazaqstannan Oslo qalasyna kóshtim. Ol ýaqytta Atyraýdaǵy norvegıalyq munaı kompanıasynda jumys istedim. Tájirıbe almasý boıynsha meni Oslo qalasyna 2 jylǵa jumys isteýge shaqyrdy. 2009 jyly daǵdarys bolyp kompanıanyń álem boıynsha biraz fılıaly jabyldy. Maǵan Norvegıada jumys usynyldy.
Jańa jerge uzaq beıimdeldim. Adamdardyń qarym-qatynasy, taǵamy barlyǵyna úırenise almadym. Alǵashqy eki jylda qatty qınaldym. Tezirek ýaqyt ótip Qazaqstanǵa oralsam eken dep oıladym. Otbasym, dostarymdy qatty saǵyndym. Sebebi Norvegıamen salystyrǵanda qazaqstandyqtardyń minezi ashyq.
Qazir Qazaqstanǵa jylyna 2-3 márte baramyn. Sońǵy ret sáýir aıynda boldym. Ákem men stýdent kezden aralasyp júrgen dostarym Almatyda turady. Ápkem Astanada, qalǵan týysqandarym Atyraýda. Sondyqtan bir jylda úsh márte osy úsh qalaǵa kelýge tyrysamyn.
Qazaqstandyq gazetterdi oqımyn. Onyń ishinde Atyraýlyq basylymdar da bar. Sonymen qatar Instagram men Facebook-te qazaqstandyq blogerlerdiń jazbasyn únemi baqylap otyramyn.
Norvegıada adam ómirin jaqsartý maqsatynda, balalar bolshaǵy men ınfraqurylymdy damytý úshin kóptegen jumystar atqarylady. Shetelde turǵannan keıin Qazaqstanda kóptegen salany áli de damytý qajet ekenin túsinesiń. Qomaqty qarjyny jelge ushyryp jatyrmyz. Al jaǵdaıdy túzetý úshin kishkentaı qadamdardan bastaý kerek. Ár turǵyn ózinen bastaý kerek. Máselen, tek óz úılerin ǵana emes páter dálizderin, aýlalardyń kórkeıýýine, taza bolýyna mán berý kerek.
Men Qazaqstandy qatty saǵyndym. Endigi jyly Qazaqstanda toıym bolady. Ózimmen birge 30-50 norvegıalyqty qonaq qylyp alyp kelemin. Olarǵa Qazaqstandy kórsetkim keledi. Men Qazaqstandy maqtan tutamyn.
Dýman Qydyqov
27 jasta, Product Engineer, týǵan jeri — Almaty, Turatyn jeri - Húston, Tehas shtaty, AQSH. Hústonda 2008 jyldan beri turady.
Men shetelde bilim alamyn dep ózime maqsat qoıdym. Mektepti bitirip, Amerıkaǵa oqýǵa kettim. Eń aldymen til kýrstaryn oqýdan bastadym. Odan keıin qarjyger mamandyǵy boıynsha kýrstarǵa baryp júrdim. Alaıda kýrstyń jartysyna kelgende bul meniń qalaýym emes ekenin túsinip, mamandyǵymdy ózgerttim. 2016 jyly Húston ýnıversıtetin mechanical engineering (mehanıkalyq ınjenerıa) mamandyǵy boıynsha bitirdim.
Men úshin Amerıkaǵa beıimdelý qıynǵa soqpady. Alǵashqy jyldary TMD elderiniń azamattyrymen tyǵyz qarym-qatynasta boldym. Odan keıin qalyńdyǵym ekeýimiz qorshaǵan ortamyz qazaqtar men orys tildi azamattar ekenin baıqap sanaly túrde olardan alshaqtaı bastadyq. Sol ýaqytta amerıkandyq ómir saltyna úırenisý prosesi bastaldy.
Men túrli stýdenttik uıymdarǵa jazyldym. Ýnıversıtettiń atynan tenıs oınaı bastadym. Amerıkan fýtbolyn jaqsy kórip qaldym. Sonyń nátıjesinde meni Hústanda sheteldik emes óz adamy sekildi qabyldaıdy. Men buǵan qýanyshtymyn. Sebebi tildik jáne mádenı kedergilerden óte aldym.
Qazaqstanda meniń anam men aǵam turady. Olar múmkindigine qaraı AQSH-qa kelip turady. Sońǵy ret Qazaqstanǵa 2008 jyly barǵanmyn.
Shetelde biraz ýaqy turǵannan keıin týyp-ósken elge degen qarym-qatynasyńyz ózgeredi. Shetelge kóship ketkender menimen kelisedi. Nelikten bizde mynaý joq, nemese anaý sala damymaǵan degen oılar jıi mazalaıdy.
Men Qazaqstan jańalyqtaryn baqylap otyramyn. Alaıda jumys kestem óte tyǵyz bolǵandyqtan jıi qarap otyramyn dep aıta almaımyn. Kóship ketken ýaqyttan beri Qazaqstan jaqsy jaqqa qaraı ózgerdi. Ǵalamtor arqyly jańa ǵımarattar, joldar, meıramhanalar men saýda úıleri salynǵanyn kóremin. Alaıda kóliktiń burynǵymen salystyrǵanda birneshe esege kóbeıgeni bar. Al avtoturaq az. Bolashaqta birneshe qabatty avtoturaqtar salynady dep úmittenemin. Sonymen qatar, iri qalalar arasyndaǵy joldardyń jaǵdaıy da kóńil kónshitpeıdi.
Qazaqstan meniń Otanym. Sondyqtan elimdi, halyqty, qazaqstandyqtarǵa tán qonaqjaılyq pen jylylyǵyn saǵynamyn. Áıelim ekeýimiz qazaqpyz. Sondyqtan aıyna bir márte et asyp, manty túıip, palaý basyp ony ystyq sút qatqan shaımen ishemiz.
Erbol Esqalıev
33 jasta, IT, Conoco Phillips munaı kompanıasy, týǵan jeri — Arqalyq, Qazir San-Fransısko, Kalıfornıada turady. AQSH.
2003 jyly men amerıkandyq munaı kompanıasynda jumys istedim. Sonda bir jyl jumys istep eńbek demalysymda AQSH-tyń Kalıfornıa shtatyna bardym. Birneshe apta ótkennen keıin ata-anam AQSH-ta qalýǵa kóndirdi. Sonda joǵary bilim alýǵa keńes berdi. Jumystan shyǵyp, Amerıkalyq ýnıversıtetke túsýge talpyndym. Ata-anam meniń sapaly bilim alýym úshin turatyn jerimdi qamtamasyz etti. Sol úshin olarǵa sheksiz rızamyn.
Amerıka halqy jyly kóringenimen, óte qaharly el. AQSH-ta «If it’s not about the money, it doesn’t make sense» degen mátel bar. Ol «Aqsha barlyǵynyń basy» degen maǵyna beredi. 2009 jyly Operations Management mamandyǵy boıynsha joǵary bilim aldym.
AQSH-ta qysqa ýaqytqa bolsa da kelgen túrli el azamattary onyń ómir súrý deńgeıi men qanshalyqty damyǵanyna tánti bolyp ketedi. İssaparmen AQSH-tyń birneshe qalasynda boldym.
Osy ýaqyt aralyǵynda kóp adammen dostasyp úlgerdim. Qazaqstannan kelgen qonaqtardy qýana qarsy alamyn. Ǵalamtor arqyly Qazaqstan jańalyqtaryn bilip otyrýǵa tyrysamyn.
Men jylyna bir ret Qazaqstanǵa kelýge tyrysamyn. Kóbine eńbek demalysyna josparlaımyn. Áıelim ekeýimiz demalysty Gavaııada ótkizemiz be álde Parıjge baramyz ba dep uzaq oılanamyz da, nátıjesinde Shymbulaqta káýap jep otyramyz.
Sońǵy 14 jylda Qazaqstan jaqsy jaqqa qaraı ózgerdi. Ekonomıka damyp, mádenıet salasy da joǵary satyǵa kóterilgeni anyq baıqalady. Jaqyn ýaqytta Otanyma oralyp, onyń damýyna úles qosamyn dep úmittenemin.
Aýdarǵan: Ásem Álmuhanbet
