Qazaqstannyń Baıqońyr ǵarysh aılaǵynan 21 qazan kúni Astana ýaqytymen saǵat 21.09 kezinde ushyrylǵan reseılik «Proton-M» zymyran tasyǵyshy josparly ýaqytynda orbıtaǵa «Ekspress-AM6» spýtnıgin shyǵardy dep habarlaıdy Azattyq radıosy  Roskosmoske silteme jasap.

«Ekspress-AM6» spýtnıgi 22 qazanda Astana ýaqyty boıynsha tańǵy saǵat 6.30-da «Brız-M» údetkish blogynan ajyraǵan. Bul bıyl 16 mamyr kúni bolǵan apattan keıingi ekinshi ushyrylym bolyp sanalady. Mamyr aıynda reseılik «Ekspress-AM4R» baılanys spýtnıgin jer orbıtasyna jetkizbek bolǵan «Proton-M» zymyran tasyǵyshynda aqaý paıda bolyp, atmosferada janyp ketken bolatyn.

Byltyr shildeniń 2-sinde reseılik úsh «Glonass» spýtnıgi tıelgen «Proton-M» zymyran tasyǵyshy Baıqońyrdan usha bere jarylyp, Qyzylorda oblysynyń aýmaǵyna qulaǵan edi. Apat ornyndaǵy zıandy zattardyń shektik konsentrasıasy týraly eki eldiń aqparaty eki túrli boldy. Sol apattan soń qazaqstandyq belsendiler Reseıdiń Baıqońyrdan geptıl qoldanatyn zymyrandar ushyrmaýyn talap etip qarsylyq aksıalaryn ótkizgen edi. Alaıda, Qazaqstan ǵarysh agenttigi men Roskosmos Qazaqstan azamattarynyń Baıqońyrdan asa zıandy otyn paıdalanyp ushyrylatyn zymyrandarǵa tyıym salý týraly usynysyna eshqandaı nátıjeli jaýap bermedi. Baıqońyr ǵarysh aılaǵy osy ǵasyrdyń jartysyna deıin Reseıge jalǵa berilgen. Bıyl Reseıde óz terıtorıasynda jańa ǵarysh aılaǵyn turǵyzý máselesi sóz bolǵan edi. Aldaǵy jyldarda Reseı Baıqońyrǵa aqsha bólýdi qysqartýy múmkin.

Qamshy-aqparat