15 qazannan beri Ebola vırýsynan kóz jumǵandar sany 322 adamǵa artyp, 4877-ge jetti dep habarlady 22 qazanda Dúnıejúzilik densaýlyq saqtaý uıymy (DSU). Bul týraly aqparatty «Azattyq radıosy» jazdy.

Jaman dertten qaıtys bolǵany rastalǵan adamdar sany keıde kúrt kóbeıip ketýiniń  sebebi - DSU  indet oshaǵy - Batys Afrıka elderindegi jergilikti jaǵdaıdyń kúrdeliliginen sanaq tym baıaý júrip jatqandyqtan bolyp otyr.   DSU Ebola indeti tabylǵan jeti eldi eki topqa bóledi. Alǵashqy topqa indetten eń kóp zardap shekken Lıberıa, Serra-Leone, Gvıneıa elderi kiredi.

Ekinshi topqa indetten azyraq zardap shegip otyrǵan Senegal, Nıgerıa, Ispanıa men AQSH jatqyzylǵan. Ótken aptada Senegal men Nıgerıada epıdemıa aıaqtaldy dep jarıalanǵan. Ispanıada jaǵdaı vırýs juqtyrǵan naýqas aýrýynan aıyqqannan 42 kúnnen keıin belgili bolady.

AQSH terıtorıasynda Lıberıada jumys istep, Ebola juqtyryp kelgen dáriger qaıtys bolǵan. Taǵy eki medbıke jaman aýrýdy juqtyryp alǵan. Aıta ketsek, mamandar qarashada ebola vırýsi Reseıge jetedi degen boljamdar jasady. Sondaı-aq Qazaqstanǵa Ózbekstan men Túrkıa arqyly da bul indettiń taralý yqtımaldyǵy bar. Qazaqstan ebola indetiniń aldyn alý sharalaryn jasap jatyr.

Qamshy-aqparat