Qaramaǵandaǵy qyzmetkerleri sybaılas jemqorlyq qylmysyn jasaǵan laýazymdy tulǵanyń ostavkaǵa ketýi zańmen qarastyrylmaq. Atalmysh másele kelesi jyly parlament qaraýyna engiziletin «Sybaılas jemqorlyqqa qarsy kúres týraly» zań jobasynda qamtylatyn bolady. Bul týraly búgin Senattyń plenarlyq otyrysy barysynda Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Qaırat Qojamjarov málimdedi. Bul týraly BNews.kz jazdy. 

«Zańnamaǵa saıası qyzmetkerler janyndaǵy olarǵa baǵynyshty qyzmetkerler sybaılas jemqorlyq qylmys jasasa, otstavkaǵa ketý máselesi boıynsha tapsyrma berilgen. Sol sebepti memlekettik qyzmet júrgizý týraly tujyrymdamaǵa kezinde zań normasy kirdi. Onda, eger saıası qyzmetkerdiń qol astyndaǵy ózi taǵaıyndaǵan nemese sol saıası qyzmetkerdiń kelisimimen taǵaıyndalǵan adam sybaılas jemqorlyq qylmys jasap, oǵan qatysty sot úkimi zań júzinde kúshine kirse, onda ol ostavkaǵa berýi kerek. Otstavkany qabyldaý ne qabyldamaý sol kisini taǵaıyndaǵan, ıaǵnı Elbasynyń sheshimi bolady. Onyń qaralý merzimi – 1 aı. Ákimshilik qyzmetkerler týraly úlken másele qozǵalýda. Biz kelesi jyly bir úlken zańdy sizderdiń qaraýlaryńyzǵa engizemiz. Bizdiń oıymyzsha, sybaılas jemqorlyqqa qarsy kúres týraly zańnama eskirdi. Ol qazirgi ýaqyttaǵy kóptegen talaptarǵa sáıkes kelmeıdi. Sol zańnamanyń sheńberinde Siz kótergen máseleni qarastyrmaqpyz», - dep málimdegen agenttik tóraǵasy Qojamjarov óz sózin.

Qamshy-aqparat