Ortalyq komýnıkasıalar qyzmetinde «Qazaqstan Respýblıkasy Prezıdentiniń Arhıvi sıfrlik dáýirge qadam: jańa baǵdar» taqyrybynda baspasóz konferensıa ótti dep habarlaıdy Qamshy aqparattyq agenttigi Qazaqstan Respýblıkasy Prezıdenti Arhıviniń Baspasóz qyzmetine silteme jasap.
Qazaqstan Respýblıkasy Prezıdentiniń Arhıvi óndiristik qyzmetin tolyqtaı modernızasıalaýǵa jáne Elektrondy arhıv qurýǵa kiristi.
Sharaǵa Qazaqstan Respýblıkasy Prezıdenti Arhıviniń dırektory, tehnıka ǵylymdarynyń doktory, profesor Borıs Álikenuly Japarov qatysty.
Onyń aıtýynsha, qazirgi ýaqytta Arhıvte Aqparattandyrý Konsepsıasy men Baǵdarlamasy tolyq keshende júzege asyrylýda, Ulttyq arhıv qory qujattaryn jappaı sıfrleý jumystary júrgizilýde, zertteýshiler úshin «vırtýaldy oqý zalynyń» aqparattyq qurylymy men modeli qurylǵan.
Zamanaýı aqparattyq tehnologıalardy engizý men Elektrondy arhıv qurý boıynsha Arhıv tarapynan atqarylyp jatqan sharalardyń durystyǵy men maqsattylyǵyn zertteýshiler men arhıvshilerdiń pikirleri de naqtylaýda.
Arhıvtiń 2021 jylǵa deıingi josparynda 1 kategorıaǵa jatatyn arhıv isterin ıaǵnı, asa qundy jáne zertteýshiler tarapynan suranysqa ıe tarıhı qujattardy sıfrlik formatqa kóshirý maqsaty tur. Osyndaı isterdiń jalpy sany 160 myń. Bıylǵy jyldyń 1 qańtardaǵy jaǵdaı boıynsha 62 myń is sıfrlengen.
Arhıvtiń buryndary qoldanyp júrgen aqparattyq júıeleri ár túrli kompanıalarmen ár jyldary túrli baǵdarlamalyq platformalardy paıdalana otyryp jasalýy bıznes-prosessterdiń oryndalýynda qıyndyqtarǵa alyp kelgen edi. Barlyq bıznes-prosessterdi tıimdi avtomattandyrý maqsatynda Arhıv 2014 jyldan bastap jańa Aqparattandyrý konsepsıasyn qabyldady. Ondaǵy basym baǵyttardyń biri bolyp Arhıv qyzmetiniń basty baǵyttary: jınaqtaý, saqtaýdy qamtamasyz etý, paıdalaný jáne ǵylymı-anyqtamalyq apparat qurý qyzmetterin tolyqtaı qamtı kele, Elektrondy arhıv júıesin qurý bolyp anyqtaldy.
QR Prezıdentiniń Arhıvi aqparattyq tehnologıalardy keńinen qoldana otyryp, birneshe ǵylymı-zertteý jobalaryn júzege asyrady. Aǵymdaǵy jyldyń 1 maýsymyndaǵy jaǵdaı boıynsha QR Prezıdenti Arhıviniń http://archive.president.kz saıtyna Qazaqstannyń jańa zaman tarıhynyń mańyzdy tarıhı oqıǵalaryn sıpattaıtyn 33 vırtýaldy tarıhı-qujattyq kórme ornalastyrylǵan. Olardyń qatarynda qazaqstandyqtardyń 1941-1945 jj. Uly Otan soǵysyna qatysýy, halyqtardy Qazaqstanǵa deportasıalaý tarıhy, 1920-1930 jj. qazaq alfavıtin latyn alfavıtine kóshirý jáne t.b. taqyryptardaǵy kórmeler bar. Álemniń barlyq zertteýshileri úshin vırtýaldyq kórmelerde biregeı arhıv qujattary onlaın rejıminde qoljetimdi. QR Prezıdenti Arhıviniń mundaı qadamǵa barýy Elbasynyń Bes ınstıtýsıonaldy reformasynyń ««Meniń Elim» Azamattyq birtektilikti nyǵaıtý» 87 qadamyna saı keledi.
