Reseı Federasıasy Qazaqstanǵa Atyraý oblysy «Taısoıǵan» áskerı polıgonyndaǵy 624 myń gektar jerdi qaıtarýda, dep jazady Qamshy.kz agenttigi.
«Reseılik áskerılerge Atyraý oblysy Qyzylqoǵa aýdanyndaǵy polıgon aýmaǵynda 749,6 myń gektar jer jalǵa berilgen edi. Qazirgi tańda eki el arasynda jasalǵan kelisim boıynsha 624 myń gektar jerdi qaıtarý prosesi júrgizilip jatyr», - dep habarlady oblystyq jer qatynastary basqarmasynyń basshysy Arman Bajenov Óńirlik komýnıkasıalar qyzmetiniń brıfıńinde.
Reseılik áskerıler buryn polıgon aýmaǵy bolǵan «Taısoıǵandy» jalǵa alsa da, ony paıdalanǵan joq. Sondyqtan, bul jerlerdi sharýalarǵa berýge eshqandaı kedergi joq.
Atyraý oblysynyń Qyzylqoǵa aýdanyndaǵy 750 myń gektarǵa jýyq jer 1949 jyldan beri áskerı polıgonǵa tıesili bolǵan. 1966-77 jyldary bul aımaqta jıyrmadan astam ıadrolyq synaq ótkizildi. Odan keıingi ýaqytta bul jer paıdalanýsyz jatqanymen, jergilikti sharýalar ıgiligin kóre alǵan joq. Óıtkeni, bul jerdi 1991 jyly elimiz táýelsizdik alǵannan keıin Reseı jalǵa aldy. Qazir polıgon aýmaǵynda 1,5 myńnan astam adam turady. Buǵan deıin Reseı jalǵa alǵandyqtan aýdanǵa qarasty ulan-ǵaıyr aýmaqty ıgerý úshin zańdy qujat rásimdeý múmkin bolmady.
Jyl basynda Reseıdiń Qorǵanys mınıstri Sergeı Shoıgý Qazaqstandaǵy Embi polıgonyn jalǵa alý jáne paıdalaný boıynsha kelisimdi toqtatý týraly qazaqstandyq-reseılik memleketaralyq hattamaǵa qol qoıdy. Oǵan saı Qazaqstannan jalǵa alǵan 300 myń gektarǵa jýyq jer qaıtarylǵan edi.
Eske salsaq, Reseıge jalǵa berilgen qazaq jerlerin qaıtarý týraly halyq arasynda oqtyn-oqtyn sóz bolady. Qoǵamdyq pikir jerdi jalǵa berý táýelsizdikke qaýipti dep sanaıdy. Teriskeıdi kórshi Qazaqstannan 7 birdeı polıgondy jalǵa alǵan. Olardyń irisi Baıqońyr ǵarysh aılaǵy. Reseı Qazaqstanǵa tıesili Baıqońyrdy 1994 jyldan bastap jaldap, jylyna 115 mıllıon dollar tólep, 2050 jylǵa deıin tolyq paıdalanýǵa ruqsat alǵan.
