Qostanaıda qazirden bastap jańa jyl atrıbýtıkalary ornatyla bastaǵan.Túrli-tústi jaryqtarǵa oranǵan úıshikter men qar beıneleri qalada búginnen bastap boı kóterýde. Jańa jyldyq bezendirý jumystary 2 aıǵa sozylady eken. Uıymdastyrýshylar qalada eki shyrsha ornatýda josparlaýda. "Jańa jylǵa áli eki aı bar degenmen, kózdi ashyp-jumǵansha ýaqyt zyrlap ótip ketedi. Sol sebepti, bizdiń kompanıa qalany bezindirý jumystaryn baıaǵyda-aq bastap ketken", - dep málimdegen "Izdatelskıı dom" JSHS dırektorynyń orynbasary Sergeı Kýznákov. Bul týraly Alau.kz saıtyna silteme jasap, NUR.KZ habarlaıdy.
Budan bólek, Pavlodar qalasynda da turǵyndardyń jańa jyldy qarsy alýǵa daıyndyǵy týraly aıtyla bastaǵan. Iaǵnı, qaladaǵy kafe-meıramhanalardyń jańa jyldyq keshterdi ótkizýge arnalǵan jarnamasy bastalǵan.
Májilis depýtaty Rozaqul Halmuradov bolsa, jeltoqsan aıy bastalmaı jatyp, elimizdiń barlyq qalalarynda Jańa jyl merekesine kirisý "dástúrge" aınalǵanyn, osy maqsatta mıllıondaǵan qarajat shyǵyndalatynyn synaǵan bolatyn. "Eger biz ult retinde táýelsizdigimizdi qadir tutsaq, eń aldymen Táýelsizdik kúni men Tuńǵysh prezıdent kúni merekelerine kóńil bólýimiz kerek. Biz Jańa jyldy toılaýǵa, qalalardy, eldi mekenderdi bezendirýge, shyrshalardy ornatýǵa qarsy emespiz. Biraq, aldymen Tuńǵysh Prezıdent kúni men Táýelsizdik kúnin merekelegennen keıin Jańa jyldy qarsy alýǵa kirissek te bolar edi ǵoı", - degen bolatyn depýtat.
Qazaqstannyń táýelsizdik kúni merekesi ylǵı da jańa jyl merekesiniń kóleńkesinde qalyp qoıady. Bul másele jylda kóterilip jatsa da ázirge jańa-jylǵa kól-kósir shashylý men táýelsizdikti umyt qaldyrý tıylmaı keledi. Tek Ońtústik Qazaqstan oblysynyń ákimi Asqar Myrzahmetov qana jańa jyldyq bezendirýlerdi tym erte bastaýǵa tyıym salyp, Táýelsizdik merekesi toılanǵan soń ǵana shyrshalar ornatylady degen bolatyn. Biz barlyq oblystar Asqar Myrzahmetovtan úlgi alsa eken deımiz.
