QR Prezıdenti Nursultan Nazarbaev elordada ótip jatqan Shanhaı Yntymaqtastyq Uıymynyń samıti barysynda uıym damýdyń jańa kezeńine «Shanhaı segizdigi» retinde aıaq basqanyn aıtty. Búgingi otyrysta uıym baqylaýshylary – Úndistan men Pákistan SHYU-ǵa múshe bolyp qabyldandy, dep habarlaıdy Qamshy aqparattyq agenttigi Baq.kz tilshisine silteme jasap.
«Astanada 12 jyl buryn eki elge SHYU-ǵa baqylaýshy mártebesin berý týraly sheshimge qol qoıyldy. Bul elder – Úndistan men Pákistan Islam Respýblıkasy. Bizdiń otyrysymyzdyń mańyzy men tarıhı máni - bul elderdiń bizdiń uıymda (SHYU-agent.eskert) alǵash ret qatysýynda. Osylaısha, uıym keńeıýde. Endi SHYU jaýapkershilik aımaǵy 3 mlrd-tan astam adam turatyn aýmaqty, álemniń jalpy ishki óniminiń úshten birin qamtıdy. Osylaısha, uıym óziniń ınstıtýsıonaldyq damýynyń jańa kezeńine «Shanhaı segizdigi» retinde aıaq basty», - dedi Elbasy.
Memleket basshysynyń aıtýynsha, búgingi tańda uıym músheleri SHYU mańyndaǵy keıbir aımaqtarda álemdik geosaıası shıelenistiń artýyna kýá bolyp otyr.
«Osyǵan oraı, bizdiń keńesimizdiń SHYU-ǵa múshe elderi memleket basshylarynyń halyqaralyq terorızmge birlesip qarsy turý málimdemesin qabyldaýy – ýaqytyly jasalǵan qadam», - dedi Nazarbaev.
Aıta keteıik, samıtke Qytaı Halyq Respýblıkasynyń tóraǵasy Sı Szınpın, Qyrǵyzstan prezıdenti Almazbek Atambaev, Reseı Federasıasynyń prezıdenti Vladımır Pýtın, Tájikstan prezıdenti Emomalı Rahmon, Ózbekstan prezıdenti Shavkat Mırzıóev keldi.
Mańyzdy jıynǵa SHYU-ǵa múshe 6 memlekettiń prezıdentterimen qatar SHYU baqylaýshy elder basshylary, premer-mınıstrleri, SHYU-da turaqty jumys isteıtin organdar, shaqyrylǵan halyqaralyq uıymdar delegasıalarynyń basshylary qatysýda.
Shanhaı yntymaqtastyq uıymy 2001 jyly qurylǵan. Oǵan buǵan deıin 6 el – Qazaqstan, Qytaı, Qyrǵyzstan, Reseı, Tájikstan jáne Ózbekstan memleketi múshe bolyp keldi. Al Aýǵanstan, Belarýs, Úndistan, Iran, Mońǵolıa men Pákistan uıymǵa baqylaýshy el márbetesine ıe. SHYU dıalogy boıynsha áriptester – Armenıa, Ázerbaıjan, Kambodja, Nepal, Túrkıa men Shrı-Lanka.
