Jeksenbi kúni tańerteń AQSH áskeri resmı túrde Aýǵanstan aýmaǵyndaǵy áskerı mindetin aıaqtady, dep habarlaıdy QazAqparat. Osyǵan deıin Ulybrıtanıa da atalǵan jerden óz áskeriniń qyzmetin toqtatqany jóninde habarlaǵan.
Reuters agenttiginiń jazýynsha, odaqtastar turaqtap kelgen Camp Leatherneck pen Camp Bastion áskerı bazalaryn jergilikti qarýly kúshterdiń ıeligine tapsyrǵan. Endi amerıkalyq jáne brıtandyq sarbazdar sońǵy tuıaǵyna deıin qalmaı ushaqpen elderine jóneltiledi.
Atalǵan eki memlekettiń áskerleri aýǵan jerinde attaı 13 jyl boldy. Osy jyldar boıy barlyǵy 940 sarbaz baqılyq bolsa, sonyń 360-y amerıkalyqtar eken.
Óz kezeginde AQSH sheneýnikteri Irakqa qaraǵanda Aýǵanstannan ásker shyǵarýdyń áldeqaıda aýyr ekenin alǵa tartady. Óıtkeni el aýmaǵynan osy ýaqytqa deıin jınalyp qalǵan áskerı jabdyqtar men qarý-jaraqtardy alyp ketý ońaı sharýa emes. Alaıda kelisim qujattaryna sáıkes, qarý-jaraq pen oq-dáriniń jartysy aýǵan sarbazdaryna qaldyrylmaq. Sondaı-aq, quny 230 mln. AQSH dollary bolatyn strategıalyq nysandar men 34 mln. AQSH dollarynyń shtab-páteri aýǵan kúshteriniń menshiginde qalatyn bolyp sheshilgen.
Qamshy-aqparat
