2001 jyldan beri sybaılas jemqorlyq qylmysy boıynsha 10 myńnan astam adam sottaldy, dep jazady Qamshy aqparattyq agenttigi sputniknews.kz portalyna silteme jasap. Bul jóninde QR Memlekettik qyzmet isteri jáne sybaılas jemqorlyqqa qarsy is-qımyl agenttiginiń tóraǵasy Alık Shpekbaev málimdedi.

"Sybaılas jemqorlyq faktileri boıynsha sottalǵandardyń 70 paıyzy atqarýshy bılik organdarynda qyzmet etken. 2001 jyldan engizilgen sybaılas jemqorlyq qylmysy boıynsha resmı statısıka osy jyldarda atalǵan fakti boıynsha 10 myńnan astam adamnyń sottalǵanyn kórsetip otyr. Osy ýaqytta jemqorlyq qylmystardan kelgen materıaldyq shyǵyn 240 mıllıard teńgeden asty. Onyń 44 paıyzy qaıtaryldy. Bul jemqorlyqqa qarsy kúres qyzmetiniń tıimdiligi men azamattyq qoǵamnyń qoldaýy artqanynyń nátıjesi", — dedi Shpekbaev búgin úkimet otyrysynda.

Ortalyq atqarýshy organdardyń ishinde sottalǵandardyń sany boıynsha İshki ister, Qarjy, Ádilet, Qorǵanys, Aýyl sharýashylyǵy mınıstrlikteri kósh basynda tur.

"2016 jyly ishki ister organdarynyń qyzmetkerlerine qatysty tirkelgen 398 faktiniń elý paıyzǵa jýyǵy jergilikti polısıa qyzmetimen baılanysty. Osy salada jemqorlyqpen kúres boıynsha jospar ázirlep, iske asyratyn qajettilik týyndap otyr", — dedi ol.

Agenttik tóraǵasynyń málimetinshe, Qarjy mınıstrliginde sottalǵandardyń 86 paıyzy — kedendik, salyq, sondaı-aq, ekonomıkalyq tergeý qyzmetiniń qyzmetkerleri. Al jergilikti atqarýshy organdar ishinde bilim berý uıymdary, ákimderdiń apparaty, qurylys, turǵyn úı-kommýnaldyq, mádenıet jáne tilderdi damytý salalary eń jemqor bolyp otyr.

Óńirler arasynda reıtıńti Shyǵys Qazaqstan, Ońtústik Qazaqstan, Qaraǵandy jáne Jambyl oblystary bastaıdy.

Sholshýy: Gúlim Jaqan