"Qazaqstan" RTRK" AQ Basqarma tóraǵasy Erlan Qarın ańyz akter Djekı Chandy Qazaqstanǵa ákelýge qansha qarajat jumsalǵanyn aıtty, - dep habarlaıdy Qamshy aqparattyq agenttigi.
"Búgin Qazaqstan telearnasyndaǵy "Túngi stýdıa" baǵdarlamasynyń erekshe qonaǵy - Djekı Chan. Bir apta buryn ol tuńǵysh ret Qazaqstanǵa ushyp keldi jáne osy suhbatty uıymdastyrý múmkindigi týdy, ol basynda tek Qytaı kınosy festıvaliniń ashylý saltanatyna qatysýy kerek edi, alaıda ol bizge múmkindik jasap, az ǵana ýaqyttyń ishinde baspasóz máslıhatyn ótkizip, baǵdarlamaǵa qatysýǵa kelisim berdi, oıda joqta boldy, sońǵy sátterde ǵana sheshildi", - dep jazdy ol Instagram esebinde.
Sonymen qatar, aıtýynsha, Djekı Channyń Astanaǵa kelýinen bir tıyn da shyǵyn bolmaǵan eken. "Ol óz ushaǵymen, dostarymen birge keldi, oǵan eshqandaı da gonorardy eshkim tólegen joq, eshqandaı da raıderin kórsetken joq. Tipti qymbat kólikpen qarsy alýdan da bas tartty, tek qarapaıym mınıven surady, sol kólikpen dostarymen birge qalany aralady. Jergilikti astanalyq restoratorlar ańyz adamdy qýana-qýana qonaq qyldy, tipti biz onyń keshki asyna da shyǵyndanbadyq", - dedi Qarın.
Djekı Chanǵa tek EKSPO sývenıri men bıletteri berilipti.
"Djekı óte erekshe, óte qarapaıym, qaıyrymdy, adal ári aqkóńil adam eken. Sýretke túsýden de eshkimge qarsy bolmady, ázil aıtyp, kóńildi júrdi. Ol bizdiń eldi unatyp qaldy, taǵy kelýge de kelisim berdi, birikken jobalarymyzǵa qatysý úshin uzaǵyraq ýaqytqa keledi. Kútemiz", - dep pikir bildirdi "Qazaqstan" RTRK" AQ Basqarma tóraǵasy.
Eske salaıyq, ańyzǵa aınalǵan akter Djekı Chan Qazaqstanǵa 7 maýsymda kelgen bolatyn. Ony Astana ákimi Áset Isekeshev áıgili akterdi áýejaıdan ózi kútip alǵan edi.
