«Kórme» kesheninde kanadalyq ǵalym Frank Albonyń «Astana: Sáýlet, mıf, taǵdyr» atty kitabynyń tanystyrylymy ótti, dep habarlaıdy Qamshy aqparattyq agenttigi QazAqparatqa silteme jasap.
«Astana álemniń birde-bir qalasyna uqsamaıdy. Ol álemdik arhıtektýradaǵy BUU sekildi. Onyń ǵımarattarynda tarıh, jer betinde ómir súretin barsha adamzattyń dástúri kórinis tapqan. Onyń Bas josparyna tabıǵattyń ózi shabyt beredi jáne oǵan álemniń biregeı taǵdyry - adamzat aldynda turǵan úsh jahandyq máseleni sheshýge ákeletin taǵdyr enedi. Ózekti máselelerdiń biri - dinı ekstremızm. Qalǵan ekeýi - ıadrolyq qarýdy taratpaý jáne tutas ǵalamshardaǵy turaqty ekologıaǵa qoldaý kórsetý. Osy úsh jahandyq máseleniń sheshilýi Qazaqstan astanasynyń úsh tamasha ǵımaratynda kórinis tapqan. Eń aldymen, Pıramıda - Beıbitshilik jáne kelisim saraıy. Bul álemniń barlyq konfesıasy pana tapqan zamanaýı kesheni ispettes. Atalǵan ǵımaratta barlyq konfesıalardyń damýyna kómek kórsetetin barsha adamzattyń teńdigi týraly aıtylatyn mańyzdy sharalar ótedi. Ekinshi ǵımarat - Nazarbaev ortalyǵy. Munda joǵaryda atalǵan úsh jahandyq máseleniń sheshilýine kúsh salyp júrgen komersıalyq emes, gýmanıtarlyq uıymdar óz oryndaryn tapty. Jáne úshinshi ǵımarat - «Nur Álem». Bul EKSPO aýmaǵyndaǵy ortalyq pavılon», - dedi Frank Alba.
Kitap avtory Qazaqstan men onyń astanasynyń biregeı jerde ornalasqanyn atap ótti. Sondaı-aq, ǵalym bes myń jyl buryn dál osy aımaqta kóshpendilerdiń úsh negizgi jańalyqty oılap tapqanyn eske saldy. Bul óńirde alǵash ret atty qolǵa úıretti, dóńgelek pen beldeý dúnıege keldi jáne barlyq eýropalyq tilder taraǵan protoúndieýropalyq tildiń negizi qalandy.
Tusaýkeserge qatysqan QR Syrtqy ister mınıstriniń orynbasary Roman Vasılenko óz kezeginde kitap avtorynyń sáýlet pen mádenıet salasyndaǵy bedeldi mamandardyń biri ekenin aıtyp ótti. Frank Albo «Germes kody» atty bestsellerdi jazǵan.
R.Vasılenkonyń aıtýynsha, «Astana: Sáýlet, mıf, taǵdyr» kitabynda profesor Alba Astananyń Qazaqstan elordasy retinde tabysty boı kóterýi men qarqyndy damýyna ǵylymı-obektıvti, tarıhı-geologıalyq, arhıtektýralyq jáne mádenı taldaý júrgizedi. Sonyń negizinde ǵalym Astananyń eldiń ortalyǵynda tabıǵı ornalasýyn Qazaqstannyń álemdik qaýymdastyq elderimen jáne halyqaralyq uıymdarmen saıası, ekonomıkalyq jáne mádenı yntymaqtastyǵynyń keń ári máńgilik bolashaǵyn qamtamasyz etetin geografıalyq turǵyda sátti ornalasýymen baılanystyrady.
