Enesi men qaıyn jurtynan qysym kórgen qyrǵyzstandyq kelinniń oqıǵasyn Qamshy aqparattyq agenttigi Azattyq radıosyna silteme jasap habarlaıdy.
«Kelin bolyp barǵannan qorlyq kórip, tozaqta ómir súrdim. Enem meni jaqtyrmady, kir jýsam da, nan pisirsem de qasymda turyp alady. Otyrsam opaq, tursam sopaq boldym... Joldasymnyń anasy meni kórgende jyny eletin boldy», - dep bastady áńgimesin kelinshek.
Al kúıeýimen sóılesip júrip bas qosqandyǵyn aıtyp ótti. Alty jyl boıy birge turǵan bul juptyń eki balasy bar. Kelin bolyp barǵannan keıin biraz ýaqyt ótken soń Tazagúldiń densaýlyǵy nasharlap, jaqsy kútimdi qajet etedi. Dárigerler aýyr jumystar jasamaýyn eskertken. Alaıda, sonan soń enesi odan saıyn ashýlana túskendigin aıtady.
«Bir gektar jerleri bar. Kúnige kartop pen júgeri shabasyń. Balaǵa da qaraımyn, jerine de qaraımyn, biraq ne istesem de, jaqtyrmaıdy. Mamyr aıynda kelin bolyp túskennen soń tamyz aıynda soqyr ishek bolyp qaldym. Aýrýhanadan kelgen kúni qamyr ılep, nan jap dedi. İshim aýyryp jatqanyn aıtsam da, qulaq aspady. Jerge túsip qalǵan almalardy tasyp, jınap alatynbyz. Jarty shelektep tasyp jatsam, «Ólgende bitesiń be?» dep eki shelektep tasytqyzdy. Keıinnen soqyr ishegim qaıta ashylyp, aýrýhanaǵa jatyp qaldym. Bez shyǵyp, tórt ret ota jasattym. Osy Bishkekte jatyp emdeldim. Al, qyzym ol kezde náreste edi, endi bes aı bolǵan. «Tezirek emdelip, jazylǵyńyz kelse, kún sáýlesine kóp shyǵa bermeńiz» degen dárigerlerdiń eskertýin aıtsam, «Onda seniń nege keregiń bar, joǵal» dedi. Balasyna osy aýrýmen ajyras dep qoımady», - deıdi ashynǵan Tazagúl.
Onyń aıtýynsha, kúıeýi bul sumdyqtyń barlyǵyn bile tura, esh ún qatpaıdy eken. Keıin kúıeýi Reseıge jumys isteýge ketken soń, enesi kelini men balasyn ajyrastyrýdyń jolyn oılaıdy. Ony bir ulynyń kómegi arqyly iske asyrmaq boldy.
«2 qarasha kúni qaıyn inim keldi úıge. Men balalarymmen uıyqtap jatqanmyn, ol kishkene qyzyp alǵan edi. Bir balany ustap alypty. Shyqsam «Bul balany tanısyz ba? Siz osy balaǵa tıeıin dep júr ekensiz ǵoı, júredi ekensizder» dedi. Meniń aýyzym ashylyp qaldy. Janaǵy baladan meniń turmysymdy buzǵaly keldiń be desem, qaıyn inime bir qarap, maǵan bir qarap, ún qatpady. Sonan soń qaıyn enem meni kók ala qoıdaı etip sabady».
Tazagúldiń qaıyn enesi men kúıeýimen baılanysý múmkin bolmady. Al, onyń Manas esimdi qaıyn inisimen sóılesip, oqıǵanyń mán-jaıyn anyqtap aıtyp berýdi suraǵanda, ol barlyǵyn da joqqa shyǵardy.
Osylaı otbasy buzylyp, eki balasynan tirideı aıyrylǵan Tazagúl ata-anasynyń úıine qaıtyp barýǵa májbur bolady. Biraq ol jaqta da kóp turaqtamady. Ózbekstannyń Ferǵana oblysy, Marjantok aýylynda turatyn ata-anasy ony qaıtadan Batkenge turmysqa beredi. Bul joly eshkim de onyń pikirimen sanaspady.
«Meni taǵy da turmysqa berdi. «Ol úılenetin bolsa, sen otyra beresiń be, tıesiń» dep berip jiberdi. Men ony kórgen emespin. Meni alyp baryp bergen kúni bir-aq kórdim. Qazir meniń qolymda túk joq. Ózbekstanǵa kire almaımyn. Qujatym joq, týý týraly kýálikti Qyrǵyzstanda alǵanmyn. Ata-anamnyń qujaty Ózbekstandiki bolǵan soń bermeıdi eken. Al maǵan Ózbekstannan kýálik joq», - deıdi ol.
Taǵdyry qatal kelinshek qazir Bishkek qalasynda. Emdelem dep júrgen Tazagúl qazir alysyraq týystarynyń úıinde panalap júr.
Qaıyn jurtynda qalǵan eki balasyn oılap, qusa bolǵan ol balalaryna qalaı jeterin bilmeı otyr. Aýyldan alshaq shyǵyp kórmegen kelin qazir qaıyrymdy jandardyń kómegine muqtaj. Qazir ózi qaıda jáne kimge bararyn bilmeı otyr. Batkenge de, óz úıine de qaıtýǵa júregi daýalamaıdy.
Sholýshy: Nazerke Labıhan
