Shetelden keletin qandastarymyzdy QR Úkimeti tegin pátermen qamtamasyz etedi. Al, azamattyqty alty aıdyń ishinde alýǵa bolady. Bul týraly búgin QR Prezıdenti janyndaǵy OKQ-niń brıfıńinde QR Densaýlyq saqtaý jáne áleýmettik damý mınıstrliginiń Eńbek jáne mıgrasıa komıtetiniń tóraǵasy Aslan Qarjaýbaev málimdegen.
Baq.kz saıty habarlaǵandaı, Komıtet tóraǵasy óz sózinde: «Ózderińiz bilesizder, osy ýaqytqa deıin oralmandardyń kóship kelý kvotasy toqtatylǵan bolatyn. Osyǵan sáıkes qarjylaı kómek berý de toqtatyldy. Al, azamattyq alý quqyǵy 4 jylǵa qaldyrylǵan edi. Kvota toqtaǵan 2012 jyldan bergi statısıkaǵa qarasaq, 2012 jyly 39 myń aǵaıyndar kóship keldi. 2013 jyly 35 myń aǵaıyn keldi. Bıylǵy jyldyń alǵashqy jartyjyldyǵynyń málimetterine súıersek, 7 myń qandasymyz kóship kelgen», - dep shetelden kóship kelgen etnıkalyq qazaqtardyń statısıkasynan habardar etti.
Sondaı-aq komıtet tóraǵasy: «Kóship kelý degen ońaı nárse emes. Sondyqtan Úkimet tarapynan olarǵa kómek kerek ekeni belgili. Úkimet osyny eskerip jańa qabyldanǵan zańǵa ózgerister engizdi. Zańǵa sáıkes, aǵaıyndar Qazaqstan aýmaǵynyń qaı óńirine kelse de ózi tańdaıtyn bolady. Elimizge kelisimen «oralman» mártebesin alady. Turaqty turýǵa ruqsat úshin tólem qabiletin rastamaıtyn bolady. Turaqty turýǵa ruqsat alysymen azamattyq alýǵa ótinish bere alady. Bylaı qarasańyz jarty jyldyń ishinde Qazaqstan azamaty atanýǵa múmkindik bar», - dep bar qazaqqa súıinshi habardy jetkizdi.
Qarjaýbaevtiń sózinshe, qandastarymyz úshin materıaldyq jaǵdaı da jasalmaq. Olardyń eń basty problemasy baspana máselesi de sheshimin tabatyn boldy. «Úkimet belgilegen mekenderge kelgen aǵaıyndarǵa kóship kelý shyǵyndaryn tóleıdi. Mindetti túrde qyzmettik pátermen de qamtamasyz etiledi. Bul qyzmettik páterdi olar 5 jyldan soń menshigine alýǵa quqyly. Endi osyndaı jaǵdaılar jasalyp otyrǵanda shetelden keletin qandastarymyzdyń sany artady dep oılaımyn. Shetelden keletin qazaqtar úshin Qazaqstannyń esigi árdaıym ashyq. Keıbir azamattardyń jańsaq aqparat taratyp «shetel qazaqtaryna Qazaqstan tosqaýyl qoıdy» degen sóz durys emes. Osyny árbir qazaq bile júrgeni jón. Shetelden qazaq osy ýaqytqa deıin kóship keldi. Aldaǵy ýaqytta da kóship kele beredi», - dedi Aslan Qarjaýbaev.
Bıyl sáýir aıynda Densaýlyq saqtaý jáne áleýmettik damý mınıstri Tamara Dúısenova shetelden keletin qandastarymyzǵa barlyq jaǵdaılar jasalatynyn, olardyń azamattyq alýyna baılanysty quqyqtyq kedergiler alynyp tastalatynyn habarlaǵan bolatyn. 6 tamyzda Úkimettiń keńeıtilgen otyrysynda Elbasy Nursultan Nazarbaev «Qandastarymyzǵa jaǵdaı jasańdar» mınıstrlikterge tapsyrma bergen edi. Alaıda Parlament qabyrǵasynda áli kúnge «kóshi-qon zańyna» ózgerister engizý týraly másele kóterile qoımady. Tarydaı shashylǵan qazaqtyń basy bir shańyraq astyna jınalyp, alashtyń aıbarlanǵanyna múddeli barsha qazaq balasy Parlamenttiń tezdetip zań qabyldaýyna eleńdep otyr.
