Túrik Respýblıkasy jarıalanǵan kún – 29 qazannyń qarsańynda, Ankarada azattyq jyrshysy, aıbyndy aqyn Maǵjan Jumabaevtyń rýhyna taǵzym keshi uıymdastyryldy. Maǵjan atamyzdyń týysqan Túrik jurtyna arnaǵan «Alystaǵy baýyryma» jyryna 83 jyldan soń «Altaıdaǵy júregim»-dep, jaýap jyryn jazǵan qarymdy qalamger, aqyn Feızýllah Býdak myrza mazmundy keshtiń basty qonaǵy boldy.

Ordaly Osman ımperıasynyń kúni eńkeıip, el shetin dushpan taptap, qıly kezeń kılikken tusta «Alysta aýyr azap shekken, baýyrym»-dep, qany bir halyqtyń qamyn jegen Maǵjan jyrynyń mańyzyn Feızýllah Býdak tebirene jetkizip, jaýappen ún qatý nıetiniń qalaı týyndap, qalaısha óristegenin baıyppen baıandady.  

Taǵylymdy taǵzym keshine jınalǵan kópshilik Feızýllah myrzanyń aıbyndy aqyn jyrlaryn qos tilde oqyp, sheber taldaýyn ystyq yqylaspen qabyldap, dúrkin-dúrkin qol shapalaǵymen qýattap otyrdy.       

Sonymen qatar, qurmetti qonaq, Mustafa Kemal Atatúrik pen Maǵjannyń tulǵalyq qalyptasýlaryndaǵy uqsastyqtar týrasynda tushshymdy tujyrymdaryn ortaǵa salyp, Túrkıa Ánuranynyń avtory Mehmet Akıf Ersoımen aradaǵy shyǵarmashylyq úndestikti salystyrmaly túrde kórkem kesteledi. 

Jıyndy túıinder tusta ónerpaz jastar – Meıirjan men Dinmuhammet ánmen shashý shashty. Áýezdi ánnen áser alǵan qaýym jáne bir tolqynysty oqıǵaǵa kýá boldy. Sahnaǵa on bir jastaǵy balǵyn Maǵjan Altaı shyǵyp, esimin qurmetpen arqalap júrgen uly atasynyń «Men jastarǵa senemin» jyryn jatqa oqydy jáne de Feızýllah myrzaǵa ystyq yqylas belgisi retinde syılyq tabys etti.

«Ankara Qazaq Jastary» birlestiginiń uıymdastyrýymen ótken keshten alǵan tálim mol bolyp, aqıyq aqyn, kórnekti qaıratker Maǵjan atamyzdyń rýhty jyrlary Anadolyda asqaqtaı tústi.

Myrzahan Baıbolov,

Gazı ýnıversıtetiniń doktoranty.