«Memlekettik satyp alý júıesin tolyqtaı avtomattandyrý elektrondy kameraly baqylaýdyń qurylýyna túrtki boldy. Endigi ýaqytta ol nysanǵa barmastan, veb-portal arqyly onlaın-rejimde júzege asyrylady. Atalǵan sharalar bir konkýrsqa qatysýshylardyń sanyn shamamen 4 esege 1-2-den 4-ke deıin arttyrýǵa jáne únemdi úsh ese ulǵaıtyp, 43 mlrd. teńgeden 130 mlrd. teńgege deıin jetkizýge múmkindik berdi», - dep atap ótti ol.

Degenmen, mınıstr memlekettik satyp alý salasynda sheshilmegen birqatar problemanyń qalyp otyrǵandyǵyn da jasyrmady.

«Birinshi kezekte, bul bir kózden satyp alý úlesiniń kólemdi bolýyna qatysty. Bul jemqorlyq kórinisteri táýekelderine túrtki bolady. Máselen, 2014 jyly jalpy kólemdegi mundaı satyp alý úlesi 79 prosentti, 2015 jyly 75 prosentti, 2016 jyly 69 prosentti qurady. Buǵan qosa, atalǵan bir kózden satyp alýdyń 69 prosenti zańmen kózdelgen negiz boıynsha satyp alýlardyń úlesine tıesili. Buǵan deıin mundaı satyp alýlar Zań normasyn qoldanbaı júrgiziletin. Qazir bul ádistiń barlyq prosedýralary portalda rásimdeledi. Bul olarǵa monıtorıń júrgizýge múmkindik beredi. Qalǵan 30 prosenti konkýrstyń ótpeýi nátıjesinde tańdap alynǵan bir kózden satyp alýlarǵa tıesili. Dál osy bir kózden satyp alý túri jemqorlyq táýekelge barynsha beıim», - dedi Sultanov.

Onyń aıtýynsha, ótkizilmegen konkýrstardyń negizgi úlesi qurylys jumystarmen baılanysty. Jalpy mundaı bir konkýrsqa 7-8 kompanıa qatysady. Degenmen, qurylystaǵy satyp alýlar ótinimderiniń keri qaıtarylýynyń basty sebebi jobalyq-smetalyq qujattarǵa baılanysty.

«Taǵy da bir mańyzdy problema satyp alýlarǵa qatysýshylardyń basym bóliginiń biliktilikteriniń tómendigi bolyp otyr. Bul sapasyz taýarlar, jumystar men qyzmetterdi satyp alýǵa sebep. Atalǵan problemany aldyn ala biliktiliktik irikteý ınstıtýtyn keńinen paıdalaný arqyly sheshýge bolady. Qazirgi ýaqytta memlekettik satyp alýlardaǵy mundaı tásil birinshi sanattaǵy kúrdeli  qurylystarda ǵana qarastyrylǵan. Sondyqtan satyp alýdyń osy tásili arqyly satyp alynatyn taýarlar, qyzmetter men jumystardyń tizimin keńeıtý jumystaryn júrgizýdemiz», - dedi mınıstr.