Soltústik Koreıa bıligi bir apta buryn ǵana bostandyqqa shyǵarǵan 22 jastaǵy stýdent Otto Ýormbıer (Otto Warmbier) Sınsınnatı aýrýhanasynda qaıtys boldy. Bul týraly marqumnyń otbasy dúısenbi kúni jarıalaǵan málimdemede aıtylady, - dep habarlaıdy Qamshy aqparattyq agenttigi Tengrinews.kz saıtyna silteme jasap.

"Otto búgin saǵat 2.20-da jaqyndarynyń ortasynda kóz jumdy. Qoldan kelgenin jasaǵan medısınalyq ortalyqtyń mamandaryna alǵys aıtamyz. Amal ne, balamyz soltústikkoreıalyqtardan kórgen azaptan qaıtys boldy", - delingen habarlamada. 

"Otto 13 maýsymda Sınsınnatıdegi úıine oralǵan kezde aıanyshty halde edi, sóıleı almady, kóre almady, daýysqa belgi bermedi. Biraq ol úıde bolǵanyn sezdi dep oılaımyz", - delingen úndeýde. Ýormbıer AQSH-qa es-tússiz kúıde kelgen. 

Eske salaıyq, Otto Ýormbıer 2016 jyldyń qańtarynda Soltústik Koreıada ustalǵan bolatyn. Ol "búldirý áreketin" jasady degen aıyppen 15 jylǵa bas bostandyǵynan aıyrylǵan. 1 qańtarǵa qaraǵan túni ol Phenán qonaqúıiniń qyzmettik bólmesine kirip, ilinip turǵan saıası únqaǵazdy alyp, jerge qoıǵan. Amerıkalyq óz kinásin tolyqtaı moıyndap, "Amerıkalyq ákimshiliktiń KHDR-ǵa qatysty jaýgershilik saıasatynyń qurbany bolǵanyn" málimdegen. 

2016 jyldyń naýryzynan beri stýdent túrmede berilgen uıyqtatatyn dári ishkennen keıin es-tússiz kúıge túsken. Soltústikkoreıalyq bılik ókilderi Ýormbıer tamaqtan ýlandy dep málimdedi.

Al bıyl shilde aıynyń ortasynda Phenán "adamgershilik nıetpen" bosatqan. AQSH-ta dárigerler tutqyndy tekserip shyqqan keıin aýyr mı jaraqatyn aldy degen qorytyndyǵa keldi. AQSH prezıdenti Donald Tramp Otto Ýormbıerdiń ólimine "solústikkoreıalyq rejım" kináli dep málimdeme jasady.