Máskeý qor bırjasy tarıhynda eýronyń rúblge shaqqandaǵy baǵamy alǵash ret qymbattap, búgin saýda barysynda 54 rúblge deıin jetti. Reseı rýbli eýro men AQSH dollaryn qosa alǵandaǵy bıvalútalyq baǵam boıynsha da arzandaı tústi. Bulaı dep Baq.kz habarlap otyr.

Reseı Ortalyq banki búgin erteńgilik saýda-sattyqtyń alǵashqy mınýttarynda rúbldiń qunsyzdanýyn tejeý úshin ıntervensıa kólemin bir jarym mıllıard AQSH dollaryna kóbeıtken. Bul soma valúta seksıasyndaǵy saýda kóleminiń teń jarymyn quraıdy. Búgin Reseı Ortalyq banki valúta juby baǵamynyń shegin 35 tıynǵa deıingi shamaǵa erkin jibergen. Valúta juby baǵamynyń shegi qazan aıynyń basynan beri osymen on besinshi ret ózgertilip otyr. Al osy merzim ishinde valúta jubynyń baǵamy 3 rúblge deıin ósken.

Sarapshylar Reseı rýbliniń qunsyzdaný úrdisin álemde munaı baǵasynyń arzandaýymen, syrtqy saıası jaǵdaılar, onyń ishinde Ýkraınadaǵy daǵdarysqa qatysty Reseıge qarsy salynǵan sanksıalarmen baılanystyrady.

Al, Qazaqstan valútasyna orys somy baǵamymen AQSH dollarynyń naryqtaǵy quny tikeleı yqpal etedi. Eger Reseı rúbl jalǵasty qunsyzdanýǵa ushyrasa bul qazaq teńgesine jaqsy áser etpeýi múmkin. Alaıda, ótken aptada Ulttyq bank teńgeniń jaqyn ýaqyttarda qunsyzdanbaıtyny týraly aqparat taratqan bolatyn.

Qamshy-aqparat