«Qazaq memleketine – 550 jyl» báıgesine!!!
Meniń tegim - Táńirqut, Kúnbı qaǵan, Kúltegin;
Meniń tegim - Qondyger, Qondyger deıtin quba jurt, keleli elmin, Qańlymyn. Men - Qańlydan týǵan han bolam. Men degeniń Ketbuqa, Inanysh bilge buqamyn. Men uly da, uly úsh júzbin. Ulyspyn jáne aryspyn. Men degeniń taıpamyn, taıpamyn jáne baryspyn. Men degen bir rýmyn, rýly el, uıaly butaqpyn. Men bolsam bir atamyn, atamyn jáne aýylmyn ...
Men - uly hanmyn ham kishi han. Sultanmyn jáne bılermin. Men rýbasy ham aqsaqal, aqsaqal jáne aýylnaı ...
Men - qyrǵynnan qalǵan bir tuıaq. Elimdi jaý shapqanda qara oshaqtyń qasynda aman qalǵan qara ulmyn. Ústi-basy qap-qara túrime qarap qalyń el «qara qursaq» ataǵan.
Men - Úısinnen qalǵan bir tuıaq. Elimdi jaý shapqanda ıende ıen dalada, japadan jalǵyz qalyppyn. Aýzyma qustar et salyp, aqqurtqany emippin. Jaýymda buǵan tańǵalyp, atpapty meni atpapty. Atpaq túgil qasterlep, han qasyna ap qalypty...
Meniń atym Sabalaq. Astanamdy jońǵar shapqanda, han ákemdi jaýym atqanda, malaıyma ilesip, shyn atymdy jasyryp, qutylyp ketken «syǵyrmyn». Úrpıgen mynaý shashyma, alba-julba kıimime «sabalaq» atym jarasqan.
Men - jaqsydan qalǵan jádiger. Jalǵyz tuqym bolamyn.
Men - tarıhtyń ulymyn, qudirettiń qulymyn. Tuqymyn túgel qurttym dep oılasa da jaýlarym, oshaqtan shyqqan «tirimin».
Meniń atym - kart tarıh, qalyń da qalyń qatpary. Umytshaq jáne ejikte. Emes qoı, endi qaıtsyn ol, baıaǵydaı jas shaǵy. Tarıhym sonan úzik-julyq. Qosylmaǵan bastary.
Men bir kezde gúldenem, gúldenem jáne joq bolam. Oqydym úsh júz jyl boıy osyndaı qısyn ottaǵan...
Men - kıeli bir tuqym. Ǵaıyptyń isi - taǵdyrym. Tegimdi jaýym joǵaltsyn, joǵaltsyn jaýym jóndesin, izimdi duspan óshirsin, óshirsin jáne kóshirsin....
Adasty sonan urpaǵyń, ata jol tappaı adasty. Mılyraqtaý bireýi: «óldik» dep te zarlady, ózimizdi ózimiz «kómdik» dep te zarlady. Suńǵylalaý bireýi basyp ótken joldardy «kórdik» dep te zarlady...
Qamyqpa, qoryqpa, qaıǵyrma, men - Máńgi elmin!
Joǵalmaıyn! «Qara oshaqtyń astynan" tabylatyn ǵaıyppyn!
Nurbek Tálenuly,
QHR, İle Qazaq avtonomıaly oblysy,
Kúnes aýdandyq 1-orta mektebi ádebıet oqytýshysy.
