Astanadaǵy Táýelsizdik saraıynda memleket basshysy Nursultan Nazarbaevtyń qatysýymen besinshi dúnıejúzi qazaqtarynyń quryltaıynyń ashylý saltanaty ótip jatyr. Bul týraly Qamshy aqparattyq agenttigi QazAqparat málimetine súıenip habarlaıdy.
Quryltaı baǵdarlamasynyń negizi QR Prezıdenti, Elbasy Nursultan Nazarbaevtyń "Bolashaqqa baǵdar: rýhanı jańǵyrý" atty baǵdarlamalyq maqalasynda aıtylǵan tujyrymdamalyq ıdeıalaryna qurylǵan. Dúnıejúzi qazaqtarynyń Quryltaıy elimizdiń qoǵamdyq-saıası ómirindegi mańyzdy oqıǵa bolyp sanalady. Ol 1992-2017 jyldar aralyǵynda ótken bes Quryltaıdyń ózara sabaqtastyǵynyń bar ekendigin kórsetedi jáne táýelsizdik kezeńderinde Qazaqstan Respýblıkasynyń aıtýly tabystarǵa, sonyń ishinde etnıkalyq kóshi-qon saıasatynyń jetistikterine qol jetkizgendigin pash etedi.
Aıta ketsek, ıyl 22-25 maýsym aralyǵynda Astanada halyqaralyq EKSPO-2017 kórmesi aıasynda Nursultan Nazarbaevtyń qatysýymen Dúnıejúzi qazaqtarynyń V Quryltaıy ótedini jáne Quryltaıǵa qatysýshy qonaqtar men delegattardyń anyqtalǵany habarlanǵan bolatyn.
Quryltaıǵa álemniń 39 elinen 800-den astam delegattar men qonaqtar qatysyp jatyr. Olardyń arasynda shyǵarmashylyq, ǵylym, pedagogıka, bıznes, sport salasynyń ókilderi, memlekettik jáne qoǵamdyq uıymdar, BAQ ókilderi bar. Jalpy alǵanda 80 paıyz delegat pen qonaq quryltaıǵa tuńǵysh ret qatysýda. Másele, Japonıa, Koreıa, Italıa, Chernogorıa, Polsha, Ázerbaıjan, Moldova elderinen qonaqtar mundaı sharaǵa alǵash ret kelip otyr.
Quryltaıǵa qatysýshylardyń 60 paıyzy 35-ke deıingi jastar. Sheteldik delegattar arasynda – Moldova parlamentiniń depýtaty, saıasatker Bogdan Syrdá, Tomsk oblysy gýbernatorynyń áleýmettik saıasat jónindegi orynbasary Shyńǵys Aqataev, Altaı Respýblıkasy Týratın aýdanynyń basshysy Amanjol Saharánov, Omsk oblysynyń zańdyq jınalys depýtaty Nurlan Qartbaev, Orenbýrg oblystyq qalalyq keńesiniń depýtaty Qurmambaı Qumaqbaev, Sankt-Peterbýrgtegi óńirlik ekonomıka jáne quqyq ınstıtýtynyń rektory Erlan Ysqaqov syndy jáne basqa da tulǵalar qatysýda.
Eske salaıyq, quryltaı aıasynda Ulttyq akademıalyq kitaphanada “Halıfa Altaı jáne oralǵan tarıh” atty ǵylymı-tájirıbelik konferensıa ótkiziledi. Quryltaıǵa kelgen sheteldik delegattar úshin din isteri jáne azamattyq qoǵam, bilim jáne ǵylym, aqparat jáne komýnıkasıa, mádenıet jáne sport, densaýlyq saqtaý mınıstrlikteri arnaıy dóńgelek ústelder uıymdastyrady.
Delegattar men qonaqtar “EKSPO-2017” halyqaralyq kórmesimen de tanysyp, “Astana Opera” opera jáne balet teatry men etnoaýylǵa da barady.
Sholýshy: Aıgerim Taýbaı
