Ertede halqymyz as adal bolýy úshin áıeldiń qolynda mindetti túrde saqına ıa júzik bolýy kerek dep sanaǵan. Qazaq arasyndaǵy «Saqınany sánge salmaıdy, ol – tazalyqqa tarazy», «Saqına sánge jatpas, aıqaı ánge jatpas» degendeı tirkesti uǵymdar saqınanyń tek sándik qana emes, gıgıenalyq qyzmet te atqaratynyn dáleldeıdi dep jazady jazady Qamshy aqparattyq agenttigi.

Munyń ózi halyqtyń saqına soǵylatyn kúmis ne altynnyń tattanýǵa ushyramaıtynyn, sýdyń, tamaqtyń tez buzylmaýyna septigin tıgizip, densaýlyqqa jaǵymdy áser etetinin erteden-aq ańǵarǵanyn kórsetse kerek. Kúni búginge deıin aýyldyq jerlerde jas kelinshek nárestesin shomyldyrar aldynda oǵan sol úıdiń úlkenderi (enesi ne abysyny) «Qolyńa saqına salyp al, tazalyqqa tán bolady» dep eskertip otyrady. Olaı bolsa, náresteni qyrqynan shyǵarǵanda ony shomyldyratyn sýǵa altyn ne kúmis saqına nemese bilezik salý dástúri olardy soǵan qatystyryp otyrǵan áıelderge syılyq retinde úlestirý úshin ǵana emes, osynda asyl buıymdardy qasıetti sanaýdan, tazalyqqa mán berýden de shyqqan sıaqty.

Medısınalyq turǵydaǵy saqına salýdyń paıdalary jeterlik. Máselen, saýsaqqa taǵylǵan saqına – búırek, baýyr, ót, júrek, júıkege tikeleı baılanysty júıke núktelerin dóp basyp, búkil qan-tamyr júıelerine oń áser etedi eken. Kerisinshe, saqınany udaıy kishi saýsaǵyna taǵyp júrgen adam arteskleroz jáne gıpertonıa keselderine ushyraıdy.