Ádebıettegi harakter – belgili áleýmettik-tarıhı orta, qoǵamdyq jaǵdaılardyń áserinen týyp, qalyptasqan adam mineziniń ádebıettegi qalpy. Bolmysty estetıkalyq turǵydan tanýda ádebı harakterdiń mańyzy zor. Óıtkeni, kórkem shyǵarmada adamdar arasyndaǵy san alýan, qat-qabat, shytyrman, kúrdeli qatynastar, tulǵa men tabıǵat oraıyndaǵy salasala baılanystar jan-jaqty beınelenedi.

Ómirdegi harakter ádebıetke kóshkende, jazýshylyq qıaldyń kúshimen sýretker muratyna, shyǵarma maqsatyna baılanysty ózgeriske ushyraıdy, naqtylanyp jınaqtylyq mánge ıe bolady. Ǵylym salalary fılosofıa, etnografıa, psıhologıa harakterdi daralap qarastyrady. Ádebıettegi harakter jandy, tiri kúıinde kórinip, júrekke uıalap, sezimdi qozǵaıdy, estetıkalyq áser beredi. Dúnıejúzilik ádebıette harakterlerdiń san alýan galereıasy jasalǵan: Er Tarǵyn, Manas, Tartúf, Gamlet, Bolkonskıı, Abaı, Pavel Korchagın, t.b. Sýretker harakter jasaý arqyly áleýmettik ortany, qoǵamdaǵy tartystardy ashyp kórsetedi. Jazýshynyń bıik muraty jaǵymdy obrazdar harakterin jasaýmen sabaqtasyp jatady. Keıipker, personaj, qaharman, tıp degen uǵymdar ár dárejede kóringen ádebı harakterdi bildiredi.