Men bala kezimnen jazýshy bolýdy armandaıtyn edim. Jáne nege ekeni belgisiz, jazýshy bolatynyma qatty senetinmin. Onyń birden-bir sebebi: men 1-shi klastan bastap «Alpamys», «Qobylandy batyr», «Qyz Jibek», «Qozy Kórpesh – Baıan sulý», «Arqalyq batyr» degen ertegi-jyrlardy bir estigennen jattap alyp, qurdas-qurbylaryma aıtyp otyratynmyn. Sondyqtan ǵoı dep oılaımyn, men orta mektepti bitire salyp, fılologıa fakúltetine tústim.
Biraq fılologıanyń qazaq bólimi emes, orys bólimine tústim. Onyń da birden-bir sebebi – qazaq bólimine túsetin stýdentter óte kóp bolady eken. Meniń alǵash qyzmetimdi bastaǵan jerim – «Qazaq ádebıeti» gazeti. Sodan keıin elge ketip qaldym. Muǵalim bolyp, eki jyldan keıin qaıtyp keldim. Bul joly «Sosıalıstik Qazaqstan» gazetinde istedim. Sodan keıin taǵy da elge ketip qaldym. Meniń bul erligim dep oılaımyn. Meniń qurdastarym da, menen 10, 20 jyl keıin bitirgen jigitter de birden ádebı qyzmetker bolyp ornalasyp, sodan shyǵa almaı qaldy. Qansha myqty talantty bolsa da, olar ómirmen baılanysy bolmaǵandyqtan birte-birte talanttarynan aıyryla bastady. Jazýshyǵa ne kerek, eń aldymen ǵajap ómirbaıan kerek. Ekinshiden, ózin-ózi tárbıeleı bilýi kerek. Sodan keıin óte kóp oqý kerek. Meniń eki kabınetke bólip qoıǵan kitaptarym bar, árqaısysynda 500-den. Solardyń bárin men oqyp shyqqamyn. Eýropa ádebıeti, Amerıka ádebıeti, Afrıka ádebıeti, Azıa ádebıeti. Azıa degende onyń ishinde Qytaı, Indonezıa, Japonıa, Indıa, Qıyr Shyǵys jáne Túrkıa, Iran sıaqty jaqyn elderdiń ádebıetterin maqtandy dep oılama, bes saýsaǵymdaı bilemin. Ádebıetke bizden keıin kelgen jastardyń eń úlken kemshiligi – ózinen basqa eshkimdi oqymaıdy. Bilim joq, talant bar. Sondyqtan ózin-ózi qaıtalaıdy, bir jazǵan óleńin on jazady, sondyqtan ony oqyrman kerek qylmaıdy. Ádebıet tek qana óziniń jańalyǵymen ǵana qyzyq bolýy kerek. Buryn eshkim aıtpaǵan oıdy aıtý kerek jazýshy. Álemde 33 qana sújet bar. Sol sújetterdi óz ómirbaıanymen ushtastyra bilse ǵana utady.
"Qazaq ádebıeti" gazeti
