QR Prezıdenti Nursultan Nazarbaev Qazaqstan halqyna dástúrli jyl saıynǵy Joldaýyn jarıalady.
«Meniń tapsyrmama sáıkes Úkimet damýdyń aýqymdy jańa baǵdarlamasyn ázirleýdi aıaqtady. Búginde bizderdiń aldymyzda turǵan syn-qaterlerge jaýap bere otyryp, men Qazaqstannyń «Nurly jol» jańa ekonomıkalyq saıasatyn jarıa etemin. Dál osyǵan men 2015 jylǵa arnalǵan halyqqa Joldaýymdy arnaımyn», - N.Nazarbaev.
Elbasynyń atap ótýinshe, jańa saıasat elimizdiń qurylymdyq reformalaryn odan ári júzege asyrýǵa baǵyttalatyn bolady.
"Men ózimniń úlken tájirıbeme qarap, aldaǵy jyldary álemde jáne biz úshin de jahandyq synaqtar bolatynyn kúni buryn sezemin. Álemniń arhıtektýrasy ózgeretin bolady. Bul kúrdeli kezeńnen memleketterdiń bári birdeı laıyqty túrde óte almaıdy, bul shepten tek myqty, birikken halyqtar men elder ǵana óte alady", - dep málimdedi Prezıdent.
Memleket basshysy Jolaýdy ne sebepti kúni buryn arnap otyrǵanyn túsindirdi. "Qurmetti otandastar! 2007 jyly álemdik daǵdarys bastaldy, syn-qaterler áli kúnge deıin bar jáne bul daǵdarys jalǵasyp kele jatyr. Reseı men Batys arasynda sanksıalyq saıasat bar. Taıaý Shyǵysta bolyp jatqan oqıǵalar da Qazaqstanǵa belgili bir dárejede yqpal etedi. Biz halyqtyń senimin aqtaý úshin sharalardy qolǵa alyp, odan basymyz bútin kúıde shyǵýymyz kerek. Taıaý jyldary elimiz úshin asa ońaı bolmaıyn dep tur, sol sebepti óz Joldaýymdy, jańa jyldan bastap neni qolǵa alý kerektigin kúni buryn arnaýdy jón kórdim. Soǵan ýaqyt berý úshin men jyldyń sońynda Joldaýymdy arnap otyrmyn", - dedi ol.
Nazarbaevtyń aıtýynsha, Qazaqstan álemdik ekonomıkanyń bir bóligi - geosaıası shıelenis epısentrine jaqyn ornalasqan el retinde álemdegi prosesterdiń jaǵymsyz áserin bastan ótkerip otyr. "Biz ne bolyp jatqanyn kórip otyrmyz. álemdik naryqtarda baǵa quldyrap jatyr, tutastaı alǵanda, ekonomıkalyq ósim baıaýlap qaldy. Halyqaralyq valúta qorynyń álemdik ekonomıka damýynyń 2014 jylǵa jáne sodan keıingi eki jylǵa arnalǵan boljamdaryn tómendeýge qaraı qaıta qaraǵany belgili. Bul da bizge áser etetin bolady. Sondyqtan keıbir ustanymdardy jedel qaıta qaraý kerek jáne aldaǵy kezeńge arnalǵan josparlarǵa túzetý engizgen jón. Bizde arqany keńge salýǵa ýaqyt joq. Biz aıtyp otyrǵan sharalardy 2015 jyldyń 1 qańtarynan bastap iske asyrý kerek, biz keleńsiz úrdisterdiń aldyn alý úshin barlyq sharany qolǵa alyp, bizge munyń zıany tımeıdi dep esepteıtin halyqtyń úmitin aqtaýymyz qajet. Bizde mundaı tájirıbe bar", - dedi Elbasy.
