13-16 shilde aralyǵynda Astanada karate-do olımpıadalyq sport túri boıynsha Azıa chempıonaty ótedi. Sport básekesine qatysý úshin 30-dan astam eldiń 627 úzdik sportshysy keldi. Azıa chempıonaty qazaqstandyq sportshylar úshin «Tokıo-2020» Olımpıada oıyndaryna upaı jınaýǵa múmkindik beredi dep habarlaıdy Qamshy.kz aqparat agenttigi.
Ortalyq komýnıkasıalar qyzmetinde karate-do boıynsha ótetin eresekter arasyndaǵy XIV Azıa chempıonaty jáne kadetter men jastar arasyndaǵy XVI Azıa chempıonatyna arnalǵan baspasóz konferensıasy ótti. Oǵan QR karate-do federasıasynyń vıse-prezıdenti Sanaýov Jastalap Ábdiqanıuly, Búkilálemdik Karate-do federasıasynyń prezıdenti Antonıo Espınoz, Búkilálemdik Karate-do federasıasynyń bas hatshysy Nagýra Toshıhısa, «Qazaqstan» RTRK AQ Basqarma tóraǵasy Erlan Qarın qatysty. «Qazaqstan» Ulttyq arnasy sharanyń aqparattyq qoldaýshysy.
Qazaqstan quramasy 2016 jyldyń 3 tamyzynda Rıo-de-Janeırodaǵy Olımpıada komıtetiniń otyrysynda «WKF karate-do» 2020 jyly Tokıo Olımpıadasynda kórsetilgen olımpıadalyq sport túrleriniń tizimine endi. Al, Azıa birinshiligi elimizde tuńǵysh ret ótýde. Buǵan deıin Malaızıa, Sıngapýr, Japonıa men Qytaı syndy alpaýyt memleketterde uıymdastyrylǵan.
-Sonymen qatar, karate-dodan Qazaqstannyń Ulttyq quramasynan álem jáne Azıa chempıondary men júldegerlerinen quralǵan 70 úzdik sportshy qatyspaq. Olardyń arasynda Azıa oıyndarynyń chempıony jáne úsh dúrkin Azıa chempıony Saǵyndyqov Rınat ta bar. Onyń jalpy upaı sany – 1215. Ol 67 keli salmaqta qatysady. 2015 jyly ótken álem birinshiliginde Qazaqstan quramasy komandalyq esepte ekinshi oryndy alǵan bolatyn, - dedi QR karate-do federasıasynyń vıse-prezıdenti Jastalap Sanaýov.
