Reseıde kedeıshilik kebin kıgenderdiń qarasy qalyńdap barady. Bir alańdatatyny osydan 5 jyl buryn olardyń sany 15 mıllıonnan astam bolsa, bıyl 22 mıllıonǵa jetken.

Reseıdiń árbir altynshy turǵyny shekten tys kedeı turady. Resmı málimet boıynsha, bıylǵy jyldyń  alǵashqy úsh aıynda muqtaj adamdardyń qataryna eki mıllıon adam qosylypty, dep habarlaıdy Qamshy.kz aqparat agenttigi  Habar-24 málimetine súıenip.

- Múgedekter, zeınetkerler sıaqty áleýmettik jaǵdaıy nashar jandardyń tabystary durys eseptelmegen. Taǵy bir sebep – jumyssyzdar sanynyń artýy. Oǵan qosa kóleńkeli ekonomıkanyń úlesi kóbeıip bara jatyr, - deıdi Ekonomıka joǵary mektebiniń profesory Aleksandr Abramov.

Ótken alty jyldyń ishinde Reseıde kedeılerdiń sany kúrt kóbeıgen. Al, bıylǵy ósiminiń sebebin mamandar naqty aıta almaıdy.

- Munaı baǵasy da, ulttyq valúta baǵamy da sol qalpynda tur. Kenetten osyndaı jaǵdaıǵa tap boldyq. Ony zerttep, arnaıy shara oılastyrý kerek. Muqtaj jandardyń sany ózinen-ózi azaımaıdy. Qazirgi  jaǵdaı ekonomıka salasyna aıtarlyqtaı ózgerister engizýdi talap etedi, - dep túıdi A.Abramov.

Bul jerde mamandar oǵash kóretin bir jaıt bar. Kedeıliktiń aldynda turǵandardyń arasynda áleýmettik jaǵynan belsendi, jumys isteıtin adamdar az emes. Naqtyraq aıtqanda olardyń sany 5 mıllıon adam. Mamandardyń aıtýynsha onyń sebebi – kóleńkeli tabys tabatyndardyń sany kóbeıgeninde. Jalpy alǵanda naqty kedeıliktiń kólemi statısıka kórsetkishterinen áldeqaıda joǵary deıdi ekonomıser.

Sholýshy: Aıgerim Taýbaı