Ólgende qabirge túsetindiginen qatty qoryqqan bir baı qaıtys bolarynyń aldynda bylaı dep ósıet qaldyrypty: «Kim de kim men ólgende qabirime bir tún qonyp shyqsa, sol adamǵa baılyǵymnyń teń jartysyn qaldyramyn!» Aıtqandaı-aq kóp ýaqyt ótpeı baı qaıtys bolypty. Baıdy qabirge qoıarda onyń ósıeti boıynsha jaqyndary qabirge birge qonyp shyǵatyn adam izdestiripti. Biraq onymen birge baryp qonýǵa el ishinen eshkimniń júregi daýalamasa kerek. Buǵan eldiń júgin tasyp kúneltip júrgen, bir qulash arqanynan basqa túgi joq sińiri shyqqan bir kedeı ǵana kónipti. Álgi kedeı baımen birge qabirge túsip jatady. Kesh bata el aıaǵy saıabyrsyǵanda eki perishte kelipti. Kelgen perishteler qabirdegi ekeýge qarap: «Myna jerde eki adam jatyr eken. Bireýi – óli, ekinshisi – tiri eken. Ólisi qaıda qashar deısiń, kel, tirisinen jaýap alaıyq» dep kedeı baıǵusty búkil ómir boıǵy istegen tirlikteri úshin jaýapqa tartsa kerek. «Myna arqandy qaıdan aldyń? Onymen ne istediń? Qashan, qaı jerge ne apardyń? Bul ózińdiki me, ózgeniki me?» degen suraqtarǵa jaýap berýmen paqyr-ekeń tańdy áreń atyrypty. Bir ǵana arqanǵa jaýap berem dep qınalǵan kedeı baıǵustyń esi shyǵyp, ústi-basy ábden qara terge malshynypty. Bir ǵana arqannyń esebin bere almaı esi shyqqan ol ertesi ózin «Baıdyń jarty baılyǵyna ıe boldyń!» dep, quttyqtaı kelgenderge: «Oıbaı-aý, men túgim joq taqyr kedeı bola tura bir ǵana arqannyń esebin bere almaı tańdy kórer kózben áreń atyryp ábden silikpem shyqty. Sender maǵan qalaısha sonsha baılyqqa ıe bol deısińder?! Qoı, aınalaıyn, ondaı baılyqtaryń bar bolsyn. Aýlaq!» dep azar da bezer bolyp at-tonyn ala qashqan eken.

Jazba Erlan Júzeevtiń Facebook paraqshasynan alyndy.