Bul týraly Investısıa jáne damý mınıstri Jeńis Qasymbektiń Facebook paraqshasynda habarlandy. Mınıstr tómendegideı jazba jarıalaǵan.
Dostar, jaqsy jańalyǵymyz bar!
2 shildeden bastap EXPO-2017 halyqaralyq kórmesi meımandaryna jaǵdaı jasaý maqsatynda «Eır Astana» áýe kompanıasy oryndaıtyn Astana–Delı baǵyty boıynsha jańa halyqaralyq reıs ashylady. Qazaqstan men Úndistan astanalaryn baılanystyratyn reıs aptasyna 3 ret, dúısenbi, beısenbi jáne jeksenbi kúnderi qatynaıdy. Halyqaralyq reısti ashý úshin QR IDM Azamattyq avıasıa komıteti men Úndistannyń avıasıalyq bıligi birlesip nátıjeli jumys atqardy.
Qazaqstannyń halyqaralyq tranzıttik habqa aınalýy mańyzdy qadamdardyń biri. Jańa halyqaralyq reıs Memleket basshysy Nursultan Nazarbaevtyń 2020 jylǵa deıin elimiz arqyly ótetin tranzıttik jolaýshylar aǵynyn 4 esege deıin ulǵaıtý jónindegi tapsyrmasyn oryndaý aıasynda júzege asyrylyp otyr.
Sońǵy 7 jylda tranzıttik áýe jolaýshylar aǵyny 20 esege artty. Perspektıvaly baǵyttardyń biri Úndistannan Qazaqstan arqyly TMD elderine baǵyttalǵan tranzıttik jolaýshylar marshrýty. Eki el astanasy arasyn jalǵaıtyn reıs 2004 jyldan beri «Eır Astana» áýe kompanıasy oryndap kele jatqan Almaty – Delı – Almaty reısin tolyqtyratyn tıimdi joba. Sondaı-aq, atalmysh reıs Halyqaralyq Astana qarjy ortalyǵy jumysynyń ilgerileýine septigin tıgizedi dep kútemiz.
Eske sala ketetin bolsaq, «EXPO — 2017 Astana» ulttyq kórmesi aıasynda Qazaqstan birqatar Batys elderimen tikeleı reıster ashty. Oǵan otandyq áýe kompanıalardyń qosqan úlesi zor deýge bolady. Air Astana áýe kompanıasy EXPO — 2017 Astana ulttyq kórmesiniń resmı seriktesi bolyp tabylady.
