Qorjymbaevtar otbasy otanasynan aırylǵaly 5 jyl boldy. Sol kúni bolǵan jantúrshigerlik oqıǵa artynda ańyrap qalǵan balalardyń áli esinde, dep jazady Qamshy.kz aqparat agenttigi QazAqparatqa silteme jasap.
Svetlana Turǵanbaeva Almaty shetindegi jalǵyz úıin sot oryndaýshylarynan qorǵaımyn dep ózin-ózi órtep jibergen bolatyn. Áıeliniń artynan sot pen prokýratýranyń tabaldyryǵyn tozdyryp júrip 4 jyldan soń aýyr naýqastan kúıeýi Zeıish Qorjymbaev ta kóz jumady.
Bul atyshýly isten soń sýdıa da, notarıýs ta isti boldy. Sot oryndaýshysyna qatysty is ashyldy.
Sodan beri memlekettik organdardyń qateliginiń kesirinen úıi joq, kúıi joq jetimder áli úılerin zańdastyra almaı keledi.
Jasy jetpeı otbasynyń barlyq taýqymetin arqalaǵan otbasynyń tuńǵyshy Aınur Omarbaeva 5 jylda ne ózgergenin aıtyp berdi.
– Eski jaranyń aýzyn tyrnaǵym kelmeıdi, árıne. Biraq qoǵam mundaı oqıǵalardy bilýi tıis. Oqıǵa qalaı boldy?
– 2012 jyly mamyrda Alataý aýdandyq sotynyń úkimin oryndaý úshin úıimizge sot oryndaýshysy Eltoqov, úıge talasqan Masaqov Mıllethan, polısıa, órt sóndirýshiler brıgadasy keldi. Biz sóılesip jatqan kezde mamam artymyzda turǵan. 1-2 saǵattaı turdyq. Saǵat 5-ke taman mamamyzdyń shydamy taýsylyp ústine benzın quıyp, sirińke alyp shyqty. Sol kezde Eltoqov anama qaraı júgiredi. «Táte jaǵa almaısyz, al jaǵyńyzshy» dep. Anam qolyndaǵy sirińkeni jaǵyp jiberdi. Analar qashyp ketti. Anam órtenip ketti. Órt sóndirýshiler sý shashyp úlgerdi. Ulardaı shýlap biz de shamamyz kelgenshe sóndirdik. Eshkim jedel járdem shaqyrǵan joq. Ózimiz shaqyrdyq. Jedel járdem kelip, anamyzdy jansaqtaý bólimine alyp ketti. 3 kún jatyp komaǵa ketti. 29 mamyrda anamyz qaıtys bolyp ketti. Sodan beri Eltoqov ta, Masaqov ta kelgen joq
– Qazir sodan beri 5 jyl ótti. Osy ýaqyt aralyǵynda ne ózgerdi? Úıdi qaıtara aldyńyzdar ma?
– Úı ázirge eshkimdiki emes. Aýada tur. Bizdiń áli «propıskamyz» joq. Sol úıde turyp jatyrmyz. Ákimdik tek anyqtama beredi. Biraq ol bir japyraq qaǵaz HQKO-da jaramsyz. Bári kúledi mynaý ne qaǵaz dep. Únemi tólqujat aýystyrǵanda 16 myń aıyppul tóleımiz. Únemi bireýlerge jalynyp júremiz, balalarymyzdy mektepke, balabaqshaǵa bersek te qınalamyz. Bosanar aldynda beriletin járdemaqyny da bireýdiń úıine turyp, 16 myń aıyppul tólep rásimdedik. Otbasynda 5 balamyz. Men - tuńǵyshymyn. Menen keıin Samat, Qaırat, Gúlnur, eń kishisi Álisher. Uldardyń aldy úılenip jatyr. Anam olardyń nemeresin kóre almaı ketti. Qazir bárimiz sol úıde turyp jatyrmyz. Basqa úıimiz joq, áıteýir kún keship jatqan jaıymyz bar. Úıge gaz kirgize almaımyz, qujat joq. Elektr energıasyna da 40-50 myńnan tólep keldik. Ákimge baryp sóılesken soń 10 myń teńge tólep otyrmyz. Mine 5 jyl boldy. 14 naýryzda ákem qaıtys boldy. Ol demikpemen aýyratyn. Myna sot qýdalaýy ol kisiniń de túbine jetti. 4 jyl boıy tozdyrmaǵan tabaldyryǵy joq. Ákem tirisinde de jazǵanbyz. 1 qorap qaǵaz tur. Bárinde shaǵymymyzdy qanaǵattandyrmaǵan.
– Sizderge qatysty úıdi bosatý týraly úkim shyǵarǵan sýdıanyń ózi qazir isti bolyp jatyr. Bul sottan ne kútesizder?
– Tek qana ádildik ornasyn. Anamnyń ólimine ákelgen úkimdi shyǵarǵan sýdıa jazalansyn. Bizge adal eńbegimizben satyp alǵan úıimizdi qaıtaryp bersin. Artqa qaraı eshteńe qaıtara almaısyń. Jaman tústegi adamdar sıaqty ómir súrdik. Endi es jıyp, úılenip, kelinder túsip jatyr. Qalaıda biz osy úıdi bermeımiz. Anam 57 jasynda, ákem 61 jasynda osy úı úshin janyn qıyp ketti. Biz de kúresetin bolamyz.
– Suhbatyńyzǵa rahmet. Ádildik ornaıdy degen úmitimizdi úzbeıik!
Aıta ketý kerek, qaıǵyly oqıǵa 2012 jyly bolǵan edi. 5 balanyń anasy, 57 jastaǵy áıel Svetlana Turǵambaeva úıin tartyp alýǵa kelgen sot oryndaýshylarynyń, kórshileriniń, otbasynyń aldynda benzın quıyp, ózin ózi órtep jibergen bolatyn. Denesiniń 85 paıyzyn kúıik shalǵan áıel aýrýhanada úsh kúnnen soń qaıtys boldy.
Qorjymbaevtar otbasy bul úıdi 2010 jyly 6 sáýirde Myńbaeva Baıan degen kelinshekten satyp alǵan. Aldyńǵy qojaıyny ony azamattyq nekedegi kúıeýi qaıtys bolǵanda mura retinde rásimdep alǵan eken. Myńbaevanyń nekesin Alataý aýdanynyń sýdıasy Ómirzaq Serimov 2009 jyly zańdy dep tapqan. Bir jyldan soń qaıtys bolǵan er adamnyń inisi Masaqov Mıllethan «men jalǵyz muragermin» dep aryzdana bastaıdy.
Sodan soń sýdıa Serimov óziniń nekeni zańdy dep tapqan sheshimin joqqa shyǵarady. Sonyń kesirinen Myńbaeva zańdy murager bolmaǵandyqtan, Qorjymbaevtardyń satyp alý týraly sharty da zańsyz dep tanylady.
Úıdiń burynǵy ıesi men Myńbaevanyń nekesin zańdy dep tapqan, keıin óziniń sheshimin qaıtyp alǵan Alataý aýdanynyń sýdıasy Ómirzaq Serimov qaıǵyly oqıǵadan soń 2 aıdan keıin jumysyna jaramsyz dep qyzmetinen shettetiledi.
Qazir Alataý aýdanynyń burynǵy sýdıasy Ómirzaq Serimov QR QK 350-babynyń 2-bólimi, 307-babynyń 4-bólimi boıynsha óziniń ókilettigin asyra paıdalanyp, kórineý ádiletsiz sheshim shyǵarǵany úshin aıyptalyp otyr. İs Alataý aýdandyq sotynda qaralyp jatyr.
