Memleket basshysynyń tapsyrmasymen QR Premer-Mınıstri Baqytjan Saǵyntaev jumys saparymen Qaraǵandy oblysyna bardy, onda «Qazaqstannyń úshinshi jańǵyrýy: jahandyq básekege qabilettilik» Joldaýy men Elbasynyń «Bolashaqqa baǵdar: rýhanı jańǵyrý» baǵdarlamalyq maqalasyndaǵy mindetterdi iske asyrý barysymen tanysady, dep habarlaıdy Qamshy.kz aqparat agenttigi Premer-mınıstrdiń baspasóz qyzmetine silteme jasap.

Bul óńirde Baqytjan Saǵyntaev birqatar ónerkásiptik jáne óndiristik nysandardy aralaıdy, olardyń ishinde metalýrgıalyq kremnıı shyǵaratyn «Tau-Ken Temir» JSHS, sútti qaıta óńdeıtin jáne sút ónimderin óndiretin «Nátıje» Sút fabrıkasy» JSHS, sondaı-aq nan-toqash ónimderin óndiretin «Saryarqa nan» JSHS kásiporyndary bar.

Baqytjan Saǵyntaev Memleket basshysynyń «Qazaqstannyń úshinshi jańǵyrýy: jahandyq básekege qabilettilik» Joldaýy aıasynda iske asyrylyp jatqan Qazaqstannyń ónerkásiptik kásiporyndaryn tehnologıalyq jańǵyrtý máseleleri jóninde respýblıkalyq keńes, «Atameken» Kásipkerler palatasynyń Óńirlik keńesi múshelerimen shaǵyn jáne orta bıznesti damytý máseleleri boıynsha kezdesý, sondaı-aq monoqalalardy damytý jóninde keńes ótkizedi dep kútilýde.

Budan ózge, QR Premer-Mınıstri Baqytjan Saǵyntaev «Qaraǵandy-Temirtaý» avtokólik jolynyń ýchaskesindegi «Ortalyq-Ońtústik» kólik dálizin jóndeý barysymen tanysady, sondaı-aq JES-2 jáne «ArselorMıttal Temirtaý» AQ-nyń basqa da óndiristik nysandaryn aralaıdy.

Anyqtama:

Qaraǵandy oblysynyń ishki óńirlik ónimi qurylymynda ónerkásip úlesi - 53,2%, aýyl sharýashylyǵy – 1,6%, qurylys – 1,6%, saýda – 10,3%, kólik – 5,2% quraıdy.

Oblystyń iri kásiporyndary: «Qazaqmys korporasıasy» JSHS, «Kazcentrelectroprovod» JSHS, «ArselorMıttal Temirtaý» AQ, «Evrazıan fýds» AQ, «Taý-ken Temir» JSHS, «Jáırem taý-ken baıytý kombınaty» AQ, «Shubarkól kómir» AQ, «Temirtaý elektr-metallýrgıa kombınaty» AQ, «Órken» JSHS, «Er-Taı» JSHS, «Aprel Qulager» JSHS.