Baıyǵyń kelse din ash. Ótken ǵasyrdyń 90-shy jyldary osyndaı «tabylǵan aqylǵa» jolyqqan keıbireýler osylaısha kásibin aınaldyryp, kishigirim bıznespen aınalysa bastady. Bázbireýler baqyrdyń ısi sezilgesin baıyrǵy baqsy-qushnashtyń bel balasyndaı bilek sybana kiristi. Turmysta tapshylyq kóre bastaǵan keıbiri «kóripkeldikti» kásip qyldy. Nadan elge aramza moldalyq qylǵan zamanda olarǵa eshqandaı toqtaýdyń bolmaǵany anyq. Bodandyq qysymynan ázer qutylyp, dinnen alys qonǵan qazaq úshin, bul «áýlıelerdiń» basy Aısa tirilip kelgenmen birdeı boldy. Berisi baryn berip, arysy tabyna bastady. Sol turmys týdyrǵan kásiptiń tuma bastaýynda Marat Esenálıev ıaǵnı «Sary áýlıe» esimi turdy. Tipti qaımana qazaqqa azan shaqyra qoıylǵan aty emes, Sary áýlıe dep, Qazaqtyń Kashpırovskııi degen laqap qosa erip júretin boldy. Din jaıynda qozǵalar taqyrypta Alladan keıin, moldadan buryn shyǵatyn esimderdiń qatarynda júrdi. Tipti sýretterin tórge deıin ilip qoıatyn deńgeıge tústi halyq. Ol keshegi «Sary áýlıe» bolatyn. Al qazir kezinde kem qoısa perishtemen dárgeıles qylǵan adamynyń pendeshiligin kórgen jurt táýbesine kelgen sıaqty. Tek táýbesin talaq qylyp júrgen «táýip» qana. Buǵan deıin Marat Esenbaevtyń áýlıeligin áshkere qylyp, KTK arnasy «Astarly aqıqatynda» aıtqan bolatyn. Nysananyń da «nysanasyna» ilikken. Marat myrza buryn úılengen, otbasy bala-shaǵasy bar adam. Áıeli qaıtys bolǵanda, jubaıynyń atyndaǵy páterdi óz atyna zańsyz rásimdep, qyzdarynyń qatysynsyz satyp ta úlgergen. Balshynyń bylyǵy osy kezden ashyla bastady. Soraqysy qyzdarymen úı úshin sottasyp, dúnıelik máselelerge «áýlıeligin» mástek qylyp minip, masqara boldy. Tipti, týǵan qyzyn «jezókshe» dep kinálap, suhbatynda men odan ALLA aldynda bas tartamyn depti. Qyzy Baqytgúl «Men ALLAnyń bar ekenine sene bastadym da, ákemnen alystaı bastadym» dep kúıinishin kúndeligine jazypty. Bul Sarymyzdyń segiz qyrly áýlıeliginiń basy eken. Jýyrda, 5 uly, 4 qyzy, 3 áıeli bar Marattyń ǵalamtor betinde myna boıjetkenmen túsken sýreti jarıalaǵan. Ol bir sózinde «otbasymyz ıslamı bolǵandyqtan, áıelderim bir-birimen tatý, buıyrsa 4-shisi de bolyp qalar. Úı-ishi asyǵa kútýde» degen bolatyn. Mine, sol tórtinshi «toqaldy» izdeý operasıasynyń barysynda jasalǵan sýretter.
Halyqty aldap tájirıbe jınaǵan dárýgerimiz endi jekelegen jandarǵa kóshe bastapty. Dindi dálel qylyp sóılegen dúmsheniń dindarlyǵy men «áýlıeliginiń » áýselesi osy súgiretterde jatyr. Shynaıy Islammen úsh qaınasa sorpasy qosylmaıtyn nárselerdi din atyna búrkep, pyshaǵy maı ústinde júrgen sabazdyń sulbasy. Bul sýret jaıly «Iá, bul qyz meniń qasymda, men ony synaq merziminde ustap júrmin. Jas qyz ǵoı, dinnen habary joq. Úıretýdemin. Kóńilden shyqpasa jibere salamyn» depti. Sary áýlıeniń ustanǵany qaı din eken? Biz tanyǵan musylmandyqqa tek 4 qatyn alamyn degeni saıyp tur. Biraq, osyndaı jolmen al degen joq qoı? Dinde nekesiz qarym-qatynasqa túsýdiń, qandaı úkimi bar ekenin otbasy «ıslamı» jolmen qurylǵan osy kisi bilmegeni me? Qazaq qyzymen oınap, oıyna kelgenin istegisi keletindigin ashyq aıtyp otyr? Synaı kele synaǵymnan «súrindige» sanap, tastaı salsa, oǵan jaýap berer kim? Óz qyzynan bas tartyp, ózge qyzdardyń «qyzyǵyn » kórip, qymyz iship qyzara bórtip júrgen áýlıemiz ne deıdi eken buǵan ? Sýretter Nur.kz saıtynan alyndy
Orynbasar Baqytbek
