Qazaqstanda medısına mamandarynyń kásibı daıyndyǵy kóńil kónshitpeıdi. Ásirese, aýyldyq jerlerde medısınalyq qyzmettiń sapasy tómen, dep habarlaıdy Qamshy.kz aqparat agenttigi QazAqparatqa silteme jasaı otyryp.

QR Densaýlyq saqtaý vıse-mınıstri Lázzat Aqtaevanyń aıtýynsha, búginde sheteldiń joǵary oqý oryndarymen birlese otyryp, elimizdiń medısınalyq bilimin jańǵyrtý sharalary qolǵa alynyp otyr. «Osyǵan oraı, medısınalyq oqý oryndarynyń strategıalyq seriktesteri anyqtaldy. Qazirgi kezde besjyldyq damý jospary daıyndalyp jatyr. Fınlándıanyń tájirıbesi negizinde bakalavrıat boıynsha medbıkelik bilimdi jańǵyrtý sharalary da qolǵa alyndy. Búginde alty kolejde pılottyq joba aıasynda 320 adam dáris alýda», – dedi Aqtaeva búgin Úkimette ótken baspasóz máslıhatynda. Alaıda dáris alyp jatqandardyń barlyǵy birdeı aýylǵa barmaıdy. Sebebi, olardy mindetti túrde aýyldy jerlerge jiberý qarastyrylmaǵan.  

QR Densaýlyq saqtaý mınıstrligi jobalardy basqarý departamentiniń dırektory Tımýr Sultanǵazıevtiń sózine qaraǵanda, jańa júıe boıynsha bilim alyp jatqan mamandar aýylǵa bara ma, joq álde, qalada qala ma, ony ózderi sheshedi. «Negizi, jergilikti bılik, ıaǵnı ákimdikter medısınalyq kolejdermen baılanys ornatyp, mamandardy ózderine shaqyra alady. Sóıtip, aýyldyń medısınasyn kóterýge múmkindik bar. Sosyn qazirgi fın modeli boıynsha qolǵa alynǵan sharalar bolashaqta barlyq respýblıkaǵa taralady. Demek, ol tájirıbe aýylǵa da jetedi», – dep atap kórsetti T.Sultanǵazıev.