Qarın basqarǵan jarty jylda qaıta túlegen «Qazaqstan» RTRK

Búgin memleket jáne qoǵam qaıratkeri, saıasattanýshy, ǵalym Erlan Qarınniń «Qazaqstan» RTRK basshylyǵyna kelgenine 6 aı boldy. Ádette qyrkúıek kelip qana «sezon jańartyp» jatatyn «Qazaqstan» telearnasy birden boı túzedi. Erlan Tynymbaıulynyń jańa qyzmetine el eleńdep qaraǵan. Eleń eter sebebi halyq «sapasyz serıaldardan sharshaǵan», rýhanı shólirkegen kúıde edi. Qarın kelgende QR Prezıdenti janyndaǵy Strategıalyq zertteýler ınstıtýty qandaı órege kóterilgenin bilemiz. Al, Qarın jańa jumysynda «Halyqtyń aınasyn» túzeı aldy ma? Kórermenge kóńilden shyǵar qyzmet ete aldy ma? Qamshy.kz tilshisi «Qazaqstan» korporasıasynyń jarty jyldyq jumysyn saralap kórdi.

Qarın basshylyǵyna kelgen «Qazaqstan» birden «Basty taqyryp» jáne «Basty aqparatpen» erekshelendi. «Basty aqparat» saraptamalyq jobasy iske qosylyp, elimizdiń jas ári bilikti sarapshylary qoǵam aldyna shyǵyp, ózekti saıası máseleler boıynsha óz pikirlerin aıtýda. Jahanda júrip jatqan prosester kún tártibine shyǵyp jatqan kezde, olarǵa dereý taldaý jasap, sarapshylyq pikirin tikeleı efırde aıtýy – halyqty álemdegi kúrdeli máseleler boıynsha aqparattandyrýdyn jaqsy tásili boldy. Memlekettik arna Qazaq saıttary kótergen máselelerge de sholý jasady. Muny Erlan Qarınniń kásibı saıasattanýshy retinde ulttyq arnaǵa alyp kelgen kásibı jańalyǵy, qosqan úlesi deýge bolady. Bir aıǵa jetpeı ulttyq arna jańa formatqa kóshirildi. Bul týraly «Qarınnyń qyryq kúndegi reformasynda» jazǵanbyz. Ulttyq arnanyń web saıty jańaryp, mobıldik qosymshasy jetildirilgeni alǵashqy aıdyń-aq enshisinde atqarylǵan sharýa boldy. Áleýmettik qoǵamnyń problemalaryn aıtatyn, saraptaıtyn «Másele» baǵdarlamasy túıtkildi dúnıelerdi túırep aıtty. «Jaıdarmannyń» mazmuny ózgerdi, saıası ázilder kóbeıdi. Júrı bolyp qoǵam qaıratkerleri qazylyq etti. Mán maǵynasy joq ázilder azaıdy, «Jaıdarman» arqyly jastar saıasaty durys arnaǵa burylyp keledi. Ulttyq arna ulttyń arnasy bolýǵa bet aldy, jan-jaqtyly jetile bastady. Qazaqstan arnasynan «Alashtyń amanaty» derekti fılmi kórsetildi. Aıta keteıik, Qarınniń tapsyrmasymen derekti fılm jalǵasty túsirlip jatyr.

Qarın basshylyǵyna kelgennen keıin ón boıyna qan júgirgen «Qazaqstan» Respýblıkalyq Teleradıokorporasıasy» Aksıonerlik Qoǵamynda jańalyq kóp. Jańalyqtyń kóp bolatyn jóni de bar. Erlan Tynymbaıuly qaıratkerlik jolynda jýrnalısıka bóten sala emes. «Dıapazon», «Vremá po Grınvıchý» sıaqty gazetter Qarınniń qalamymen qosa jetilgen. Ulttyq qaýipsizdik pen memlekettik saıasatta mol tájrıbeli basshynyń eldiń basty arnasyna bergen saıası reńi «1 stýdıa» tok shoýynan kórindi. Al, arnaǵa ulttyq reń beretin «Men qazaqpyn» halyqaralyq óner dodasy jańa maýsymda kórermenmen qaýyshpaq. Atalǵan megajobaǵa mınıstr Abaev ta úlken kóńil bólip otyr.

Ulttyq kórme óter aldynda Qarınniń uıyqty bolýymen Astanada «Qytaı kınofestıvali» ótti. «Qazaqstan» RTRK Qytaıdyń ortalyq televızıasy CCTV-men jáne Hýnan TV korporasıasymen kelisim jasady. Elbasy qatysqan, Álem nazaryn aýdarǵan EXPO-2017 ulttyq kórmemizdiń ashylýyn ulttyq arnamyzdan tikeleı tamashaladyq. Astana kúninde ulttyq arna tilshileri el aralap, halyqtyń arasynan reportaj jasady. «Qazaqstan barysyn» da halyq bıyl tikeleı efırden tamashalap, taqymyn qysty.

Erlan Tynymbaıuly korporasıa basshylyǵyna kelgen kúni  bylaı dep jazǵan bolatyn: «Elimizdegi eń iri medıa qurylymda qyzmet atqarý - birneshe urpaqtyń taǵdyryna jalǵasqan sabaqtastyqty kótere bilý, ári ıisi qazaqtyń aldynda jaýapkershilik júgin arqalaýmen teń. Eń aldymen, osyndaı jaýapty jumysty senim artyp tapsyrǵan Elbasyǵa alǵys aıtqym keledi. Qandaı qyzmette bolsam da Elbasynyń qoldaýyn, demeýin kórip kelemin. Bul joly da Memleket basshysynyń seniminen shyǵýǵa tyrysamyn.

Korporasıa quramy óte úlken. Jalpy sany 2 myńnan astam adam qyzmet etedi. «Qazaqstan» Ulttyq telearnasy, «KAZsport» telearnasy, «Balapan» telearnasy, Qazaq radıosy, «Shalqar» radıosy, «Astana» radıosy, «Classic» radıosy sekildi óz aýdıtorıasyn qalyptastyrǵan, kórermenderi men tyńdarmandaryna sapaly kontent usynyp kele jatqan úlken jobalar. Odan bólek aımaqtyq arnamyz ben birneshe ınternet saıt jumys isteıdi.

Teleradıo kesheni buǵan deıin de jýrnalısıkanyń, aǵartýshylyqtyń, el damýyndaǵy bıik jetistikterdi kórermen qaýymǵa jetkizýdiń biregeı qaınary bolyp keldi. Aldymyzda ujymnyń jumysyn odan ári jetildirý, dástúrin saqtaý arqyly zamana kóshine ilesip, talǵampaz kórermenderdiń údesinen shyǵý, búgingi medıanyń barlyq talaptaryna jaýap berý mindeti tur. QR Aqparat jáne komýnıkasıa mınıstri Dáýren Abaev myrza teleradıokorporasıanyń aldynda naqty jańa basymdyqtardy aıqyndady. Júktelgen jańa mindetterdi atqarýǵa bar kúshimizdi salamyz».

Joǵaryda atalǵan korporasıa quramyndaǵy telearnalar men radıolarda da oń ózgerister kórine bastady. Erlan Tynymbaıuly ózi oblystardy aralap aımaqtyq mekemelermen, el aǵalarymen, zıalylarmen kezdesýler ótkizdi. Korporasıaǵa qarasty barlyq mekemelerge bilikti mamandar, kásibı jastar kele bastady. Bes jyl boıy reıtıń ustap turǵan «Kelin» serıalyn qurtyp, onyń ornyn otandyq kontentpen toltyryp, reıtıńin kerisinshe joǵarlatty. Tipti, Qazaqtildi telehıkaıalar túsirilimi qolǵa alyna bastady.  «Qazaqstan» arnasy jańalyqtarynyń operatıvtiligi arta tústi. 6 aıda az sharýa atqarylmady. Jańa maýsymda kórermendi kútip turǵan jańa jobalar jeterlik. Jańa stýdıa, jańa kelbet. Ulttyń televızıasy — eldiń aınasy jańaryp jatyr. Rýhanı jańǵyrý. Bastysy «Qazaqstannyń» qazirgi kelbetine qarap, Qarın ózine júktelgen mindetterdi atqara aldy deýge ábden negiz bar.

Memlekettik telearna basshylyǵyna memleket qaıratkeri kelgen jarym jyldaǵy basty másele aqparattyq qaýipsizdiktiń qalqany qalyptasty. «Memlekettik saıasat ıdeology» statýsyn bekite túsken Teleradıokorporasıa basshylyǵyna kelgen tuńǵysh saıası qaıratker Qarınniń jarym jyldaǵy jumysyn bir sózben «Qazaq televızıasynda jańa bet-beıne qalyptastyrdy» deýge bolady.