Ol - shyǵys jekpe-jek ónerin jetik meńgergen jaı ǵana sportshy emes. Ol tumandy, qarabarqyn álemge jiberilgen jaryq juldyz sekildi edi. Ol shıe bóriler men qandender, túlkiden azǵan qarsaqtar qaptaǵan dalaǵa naǵyz kókbóri rýhyn alyp jetken kókjal bolatyn.
Onyń atalary ádiletsizdik pen qorlaýǵa tózbegen, ór namysy men asqaq keýdesin jaýlaryna bastyrǵysy kelmegen naǵyz dala qyrandary bolatyn. Eselesken dushpanǵa bas ımeıtin, qoıdaı qaıyryp, qoraǵa kúrgeıleýge kónbeıtin túz tarpańdary erlik týyn jyqqan joq. Jaýlarymen atysty da shabysty, biraq alǵan betinen qaıtpady. Alyp shól Taklamakandy basyp, aspanmen tildesken Gımalaıdy asyp, aqyry Anadolyǵa jetti. Sol batyr eldiń, qaısar qazaqtyń taza qandy uldarynyń biri Mustafa Kabeıuly Óztúrik bolatyn.
Shoqtaı janǵan janarynan kókbóriniń rýhy laýlap, aınadaı jan-dúnıesi jarqyrap turatyn. Batyrǵa bitken mysy, asylǵa bitken minezi Táńir erekshe jaratqan bolmysyn naǵyz noıan edi.
Elim, jerim, ultym, qazaǵym degen sózdi ol jan-tánimen berilip aıtty. Qazaǵym degen uldyń júregi appaq, nıeti kirshiksiz taza edi, biraq ony qaskóıler qyzyl qanǵa boıady. Tazqaralar men quzǵyndar jaılaǵan aspanda, bıikke qanat qaqqan qyrannyń topshysyn qıyp, omyrtqasyn úzdi. Túbi Mustafadaı erge jasalǵan qastandyq, aıaýsyz qaskóıliktiń arty ashylmaı qoımas. Óıtkeni, qan qaryzy, halqy súıgen beıýaz uldyń obaly eshkimdi jibere qoımas.
Oǵan degen el-jurttyń peıili qandaı edi. Halyq shyn yqylas-nıetimen, mahabbatymen bıikke kótergen Mustafa táýelsizdikti jańa alyp, quldyqtyn qursaýynan endi bosaǵan eldiń eńsesin kóterýge, rýhyn órletip, namys týyn jelbiretýge kelgen jebeýshi, sanany buǵaýlaǵan temir shynjyrdy týraýǵa jibergen Táńirdiń aldaspan qylyshyndaı edi. Iá, onymen kezdesken, tálimin alyp, ónerin úırengen, sózin tyńdap, júzin kórgen jannyń bári sony ańǵardy, sezindi. Sol sezim áli de halyqtyń júreginde. Tiri bolsa Alashtyń aıtóbel batyry alpysqa tolar edi... Amal ne?! Onyń rýhy daryǵan, qasıeti qonǵan uldarymyz aman bolsyn!
Aıtpaqshy, áıgili ákter, jekpe-jek óneriniń sheberi Brús Lıdiń kınosyn kóp kórgender Mustafa Óztúrikteı dúldúl uldy «qazaqtyń Brús Lıi» deıdi eken. Óimizdi ózgelerdiń sheginen asyra almaıtyn mojantopaılyqtan basqa túk te emes bul. Iá, Brús Lı da aıtýly tulǵa. Biraq, ártis sportshyny Mustafadaı batyrmen, bolmysy dara, qyran minez, kókjal rýhty naǵyz Kóktúriktiń urpaǵymen teńestirý tym taıyzdyq bolar edi. Birge óner úırengen, qasynda bolǵan Brús Lıdiń qatardaǵy adam ekenin Mustafa batyrdyń ózi de aıtyp ketken. Kemsitý de, kóre almaý da, tómen sanaý da emes, shynaıy pikir, qalypty kózqaras.
Sondyqtan, Mustafa Óztúrik qazaqtyń Brús Lıi emes, ol – qazaqtyń Mustafa Óztúrigi, ultynyń oǵlany, eliniń naǵyz eńirep týǵan Eri!!! Jatqan jeriń jaıly bolyp, rýhyń aspanda shalqysyn, asyl aǵa!
Murat Almasbekuly
