Shyǵys Qazaqstan oblysy Ulan aýdanynyń Shalqar kólinen qutqarýshylar 23 jastaǵy jigittiń denesin alyp shyqty dep habarlaıdy Qamshy.kz aqparat agenttigi yk-news.kz málimetine súıenip.

SHQO TJD baspasóz qyzmeti habarlaýynsha, jas jigit dostarymen birge sý jaǵasynda demalyp júrgen. Sýǵa súńgip ketken ol birshama alystap ketip, jeldiń qattylyǵynan jaǵaǵa jete almaı qalsa kerek.

«Jastar demalyp júrgen sýdyń jaǵasy jabdyqtalmaǵan, onda eskertý belgisi de, qutqarý munarasy da joq bolǵan. Buǵan qosa jeldiń ekpini de qaýip týyndatqan. Dál osy kúni bizdiń №6 bólimshe qaıǵyly oqıǵa oryn alǵan jerge jetti. İzdeý jumystary shamamen bir saǵatqa sozylyp, jaǵadan 50 metr qashyqtyqtan, 10 metr tereńdikten jas jigittiń denesi tabyldy», –  deıdi SHQO sýdan qutqarý qyzmetiniń qutqarý bólimshesiniń bastyǵy Nurjan Baıjaqov.

Sýǵa túsý maýsymy bastalǵaly beri Shyǵys Qazaqstanda 40 adam sýǵa ketken. Qaıǵyly oqıǵalardyń 30-y joǵaryda aıtylǵandaı jabdyqtalmaǵan sý aıdynynda tirkelgen.