Búgin Qazaqstan Respýblıkasy Ulttyq mýzeıinde «Qasıetti Qazaqstan» ortalyǵynyń ǵylymı-saraptamalyq keńesiniń otyrysy ótti dep habarlaıdy Qamshy.kz aqparat agenttigi QR Ulttyq mýzeıiniń baspasóz qyzmetine silteme jasaı otyryp.

Otyrys maqsaty jalpyulttyq deńgeıdegi 100 nysandy belgileý jáne tizimdeý boldy. İs-sharaǵa Memleket tarıhy ınstıtýtynyń dırektory, profesor B. Aıaǵan, profesor Z. Samashev, Respýblıkalyq «Ardagerler uıymy» Ortalyq keńesiniń tóraǵasy, profesor Ó.Ozǵanbaev, profesor J. Artyqbaev syndy esimderi elge belgili tulǵalar qatysty.

«Qazaqstannyń jalpyulttyq qasıetti jerlerin» belgileý maqsatyndaǵy ǵylymı-saraptamalyq keńesi otyrysynyń kún tártibinde atalǵan ortalyqtyń 2 aı ishinde atqarǵan jumysy týraly aqparat berilip, Qazaqstannyń jalpyulttyq deńgeıdegi kıeli jerlerin  anyqtaý, ǵylymı tizimdeý men júıeleý máseleleri qozǵaldy.

Ǵalymdar usynylǵan tizimniń jobasyn jan-jaqty talqylap, óz pikirlerin ashyp aıtty. T.ǵ.k., profesor Zeınolla Samashev: «Bizde tarıhı oqıǵalar ótken, biraq dál qazirgi kúni ol jerde eshqandaı belgi saqtalmaǵan, eshqandaı iz baıqalmaıtyn jerler bar. Qıraǵan eskertkishterdiń synyǵy nemese jaı orny ǵana qalǵan nysandar bar. Alaıda tarıhı máni óte zor bolǵandyqtan, ol jerdi qurmettep jatamyz. Mysaly, «Tańbaly tasty» alsaq, tolyq qalpyna keltirý jumystaryn qajet etedi. Ol óte mańyzdy nysan. Meniń jeke usynysym, búgingi kúni esh belgisi saqtalmaǵan, biraq tarıhı mańyzy bar oryndardy osy tizimge engizgen jón», – dep óz usynysyn aıtty.

Qazaqstannyń tarıhı-mádenı murasy men áleýmettik-saıası ómirindegi mańyzdy oryn alatyn qasıetti oryndar búginde ulttyq birlik pen jańǵyrý nyshany retindegi nysandar bolmaq. «Qasıetti Qazaqstan» ortalyǵynyń aımaqtardan alǵan málimetterine qazaqstandyq ǵalymdar, ólketanýshylar, qoǵam qaıratkerleri birlese otyryp, saraptama júrgizedi. Al oblystardaǵy qasıetti, kıeli jerlerdi anyqtaý úshin jergilikti mádenıet basqarmalarynyń jetekshilik etýimen tarıhshylar, ǵalymdar, qoǵam qaıratkerlerinen qurylǵan arnaıy toptar jumys isteýde.

Atalǵan ortalyqtyń jetekshisi Berik Ábdiǵalıuly: «Bul – bes  jylǵa josparlanǵan joba, bıyl jalpyulttyq deńgeıdegi, elge keńinen tanylǵan 100 nysandy anyqtaý qolǵa alynǵan. Bul tizim jobasyna búgingi keńestiń qorytyndysy boıynsha Ulttyq komısıa saraptama jasap, bir, eki aı kóleminde bekitedi. Kesene, eskertkishterdi, arnaıy bir oryndy ǵana emes, biz Elbasynyń maqalasynda atap kórsetilgen sol nysandarmen baılanysty rýhanı qundylyqtardy nasıhattaımyz. Ol nysan qandaı tarıhı oqıǵamen, qandaı salt-dástúrmen, qaı kezeńmen baılanysty ekenin anyqtaımyz. Sol arqyly urpaqqa jat aǵymdardyń bóten pıǵylyna qalqan bolatyn  rýhanı tárbıeni sińirý, nasıhattaý, nyǵaıtýdy maqsat etip otyrmyz», – dep ortalyqtyń maqsatyn aıqyndap aıtyp berdi.