«Astana EKSPO-2017» ulttyq kompanıasy baspasóz qyzmeti kórmeni 1 qarashaǵa deıin uzartýdy suraǵan astanalyq kásipkerlerdiń úndeýhatyna jaýap berdi, dep habarlaıdy Qamshy.kz aqparat agenttigi QazAqparatqa silteme jasap.
Eske sala ketsek, keshe týrısik operatorlar «Astana EKSPO-2017» UQ AQ basqarma tóraǵasy Ahmetjan Esimovten halyqaralyq kórmeni 1 qarashaǵa deıin sozýdy suraǵan edi. Ashyq hat avtorlarynyń aıtýynsha, týroperatorlar men týrbirlestikter úshin tuńǵysh ret týrızmnen paıda tabý múmkindigi týǵan.
«Biz olardy jaqsy túsinemiz, EKSPO kezinde olar óte qomaqty tabys tabýda. Kórme bastalǵan sátten beri Astanaǵa 1 mıllıon 772 myń 489 týrıs kelgen. Bul kórsetkish ótken jylmen salystyrǵanda 4,5 esege kóp. Keshe bastamashyl top ókilderimen kezdesip, ýájderin tyńdadyq. Árıne, olar úshin qýanyshtymyz, EKSPO-nyń basty mindetteriniń biri týrızmdi damytý edi. Degenmen, EKSPO halyqaralyq kórmeler búrosynyń reglamentine sáıkes, 3 aı ǵana jumys isteıdi. Bul - kásipkerlerdiń usynysyn qabyldaı almaýymyzdyń basty sebebi. Onyń ústine kórmeniń halyqaralyq qatysýshylarynyń búdjeti esepteýli, kórmeni uzartý olarǵa da ońaıǵa soqpasy anyq», - dedi «Astana EKSPO-2017» ulttyq kompanıasy qoǵammen baılanys departamentiniń dırektory Sergeı Kýıanov.
Sonymen birge, Qoǵammen baılanys departamentiniń basshysy kórme aıaqtalǵan soń da EKSPO-nyń birqatar ǵımarattarynyń óz jumysyn jalǵastyratynyn habarlady.
«Kórmeniń basty ǵımaraty - Nur Álem pavılony týrısik nysan retinde qaldyrylady. Ol Bolashaqtyń mýzeıi dep atalatyn bolady jáne turaqty negizde jumys isteıdi. Art ortalyq pen Úzdik tájirıbeler aımaǵy da qala beredi. Eki aıda bul pavılondarǵa 120 myńnan astam adam kelgen. Kongres ortalyq pen Energıa Hol da jumys isteı beredi», - dep óz sózin túıindedi S.Kýıanov.
