Astana qalasynyń ákimi Gýanchjoýdan (Qytaı Halyq Respýblıkasy) halyqaralyq mamandandyrylǵan EKSPO-2017 kórmesinde Gýandýn provınsıasy aptasynyń ashylýyna kelgen delegasıamen kezdesti dep habarlaıdy Qamshy.kz aqparat agenttigi Astana ákimdiginiń baspasóz qyzmetine silteme jasaı otyryp.
Kezdesý barysynda Gýanchjoý qalasynyń saıası konsýltatıvti keńesiniń tóraǵasy Lú Iýelýn men Astana ákimi Áset Isekeshev eki qala arasyndaǵy áriptestik múmkindikterin talqylady.
Qonaqtardy Qazaqstan astanasynyń ınfraqurylymy tańǵaldyrǵan.
-Sizderdiń qalalaryńyzda bolǵanymyzǵa qýanyshtymyz. Men úshin jáne delegasıa úshin bul Astanaǵa alǵashqy saparymyz. Biz qalanyń ınfraqurylymyna qyzyqtyq. Salynǵan arhıtektýralardyń stıli ártúrli jáne Astanada joldar keń eken. Biz qalany josparlaýda sizderdiń tájirıbelerińizdi qoldanǵymyz keledi. Sol sebepti sizderdiń qalalaryńyzben áriptestik ornatýdy qalaımyz, - dedi Gýanchjoý qalasynyń saıası konsýltatıvti keńesiniń tóraǵasy Lú Iýelýn.
Sondaı-aq sheteldik meımandardy qalamen tanysý barysynda óziniń kórkemdigimen, tazalyǵymen Esil ózeni qyzyqtyrdy.
Eki qalaǵa tájirıbe almasyp, áriptestik ornatý úshin perspektıvalyq baǵyt - týrızm salasy bolyp tabylady. Astananyń Gýanchjoýmen dostyq baılanys ornatýy saýda-ekonomıkalyq, mádenı jáne bilim salalarynda úlken múmkindikterge jol ashady.
Aspan asty elinen kelgen delegasıa kezdesý sońynda Astanamen yntymaqtastyq ornatýǵa nıetti ekendikterin bildirdi.
Al, erteń elordada ınvestısıa baǵytynda tájirıbe almasý boıynsha Qazaqstan-Qytaı jınalysy ótedi. Onda kelgen tarap qatysyp, belsendi atsalyspaq.
