21 tamyz kúni Senegal Respýblıkasynyń Ulttyq kúni atap ótildi. Senegal saıasatynyń basty baǵyttarynyń biri energetıkalyq táýeldilik deńgeıin tómendetý bolyp tabylady dep habarlaıdy Qamshy.kz aqparat agenttigi EKSPO-2017 kórmesiniń medıa-ortalyǵyna silteme jasaı otyryp.
Merekelik sharanyń resmı bóliginde Senegal Ulttyq agenttiginiń Eksportty damytý boıynsha bas menedjeri Malık Djop energıa ekonomıkalyq jáne áleýmettik damýdyń negizi ekenin atap ótti. Sol sebepti Senegal Respýblıkasynyń Úkimeti 2017 jyldyń sońyna qaraı eldiń energetıkalyq teńgerimindegi jańartylatyn energıa kózderiniń úlesin 20%-ǵa kóbeıtýdi josparlaýda.
«Energetıkalyq jáne ekologıalyq máselelerdi sheshý úshin álem elderin ózara tyǵyz yntymaqtastyq ornatýǵa shaqyramyn. Búgingi kúni Senegal Afrıka kontınentindegi jańartylatyn energıa resýrstaryn qoldaný boıynsha jetekshi memleketterdiń biri bolyp tabylady. Biz kún jáne jel energıasyn óndiremiz. Úsh kún-elektr stansıalarynyń ashylýynan keıin, Dúnıejúzilik banktiń qoldaýymen, Senegal jalpy qýaty 350 MVt kún elektrostansıalarynyń qurylysyna tender jarıalaıdy. Sonymen qatar, elde ishki bıogazdy óńdeý tehnologıasy damyǵan. «Bolashaq energıasy» taqyrybyndaǵy EKSPO-2017 kórmesi biz úshin mańyzdy, sebebi taqyryp balamaly energıa kózderin damytý jáne engizýmen baılanysty respýblıkanyń saıası baǵytyna saı keledi. Bul kórme jańartylatyn energıa kózderin engizýge jáne kómirqyshqyl gaz qaldyqtaryn qysqartýǵa yqpal etedi», – dep atap ótti Senegal Ulttyq agenttiginiń Eksportty damytý boıynsha bas menedjeri.
Óz kezeginde Qazaqstan Respýblıkasy Mádenıet jáne sport mınıstrliginiń Týrızm ındýstrıasy komıtetiniń tóraǵasy Maınúra Mýrzamadıeva Astana qalasynda «Bolashaq energıasy» taqyrybyndaǵy EKSPO-2017 kórmesin ótkizý Qazaqstannyń balamaly energıa kózderin damytý jolynda yntasyn kórsetedi dep atap ótti. Sondaı-aq, Senegal Respýblıkasynyń «Senegaldy qurý úshin taza energıa» taqyrybyndaǵy ekspozısıasynyń mazmuny kórmege kelýshilerdiń qyzyǵyn týdyratynyn aıtty.
Esterińizge sala keteıik, Senegal Respýblıkasy – batys Afrıkada ornalasqan memleket. Respýblıka 2035 jylǵa qaraı damýshy elder qataryna qosylýdy kózdeıdi. Senegaldyń negizgi damý baǵyttarynyń biri – memlekettiń energetıkalyq táýeldilik deńgeıin tómendetýdi qamtamasyz etý bolyp tabylady. Senegal Respýblıkasynyń ekspozısıasy Afrıka Plazasynda usynylǵan.
