Jyl saıynǵy «Mektepke jol» aksıasyna atsalysatyn din qyzmetkerleri bıylda ár óńirlerde aýqymdy sharalar ótkizýde. Bas múftı Erjan qajy Malǵajyuly Almatyda «Mektepke jol» aksıasynyń aýqymynda 1000 balaǵa mektepke qajetti oqý qural-jabdyqtaryn tabystady dep habarlaıdy Qamshy.kz  aqparat agenttigi QMDB baspasóz qyzmetine silteme jasaı otyryp.

«Bilim alý, úırenýge umtylý – shynaıy musylmandyq qasıet. Allaǵa shúkir elimizde sizderdiń zamanaýı bilim alyp, bilikti maman atanýlaryńyz úshin barlyq jaǵdaı jasalyp keledi. Sol sebepti de, tereń bilim alý jolynda aıanbaı, talmaı izdenip, el tizginin berik ustaıtyn azamat bolyp ósýlerińizge tilektespin. «Mektepke jol» aksıasy jyl saıyn júzege asatyn dástúrli izgi jobaǵa aınaldy. Osynaý saýapty bastamaǵa úles qosyp, demeýshilik jasaǵan din janashyrlaryna, jekelegen azamattarǵa alǵys aıtamyz. Alla Taǵala izgi amaldaryńyzǵa saýaptan jazyp, meıirimine bólesin», – dedi Erjan qajy Malǵajyuly.

İs-sharanyń basty maqsaty az qamtylǵan otbasylar men kópbalaly otbasylardan shyqqan balalarǵa mektepke barar kezinde kıim-keshek, aıaq-kıim, keńse taýarlary, oqý quraldarymen qamtamasyz etip, demeý jasaý. Bul «Mektepke jol» aksıasy respýblıka boıynsha ár meshitte jyl saıyn uıymdastyrylyp keledi. Tek Almaty qalasy boıynsha ótken jyly 1500 oqýshyǵa mektep formasy men qajetti zattar tabystalǵan.

«Bas múftıdiń ózi kelip, «Mektepke jol» aksıasyna qatysyp, syılyq berýi qýanysh syılady. Osy sharaǵa tórt balam qatysty. Kóp balaly otbasylardyń barlyǵy balalaryna mektepke qajetti zattaryn ala almaıdy. Bul aksıa osy turǵyda paıdasy kóp. Sol sebepti osy aksıa ımamdar tarapynan dástúrli túrde, jyl saıyn jańa oqý jyly qarsańynda uıymdastyrylatynyna qýanyshtymyn. Balalar baqytty bolsyn. Al osy aksıanyń uıymdastyrylýyna muryndyq bolyp, bar qamqorlyǵyn balalardan aıamaı kómektesip jatqan azamattarǵa alǵys aıtamyn», – dedi Gúlzat Amanqulov esimdi kóp balaly ana.

«Maǵan mektepke qajetti zattardy berdi. Onyń ishinde sómke, dápter, kúndelik, syzǵysh, óshirgish te bar. Óte qýanyshtymyn. Endi jaqsy oqyp, bilim alatyn bolamyn», – deıdi 5-synyp oqýshysy Abdýlazız Máýlenqul.