Almaty ákimi Baýyrjan Baıbek kezekti jumys saparynda jol jáne komýnaldyq ınfraqurylymdy qaıta jasaý jumystarynyń barysyn tekserdi dep habarlaıdy Qamshy.kz aqparat agenttigi Almaty qalasy ákimdiginiń baspasóz qyzmetine silteme jasap. 151 shaqyrym jol, 85 kóshe, 32 jaıaýjol.
Baspasóz qyzmetiniń málimetinshe, búginde magıstral kóshelerdegi josparlanǵan 151 shaqyrym joldyń barlyǵyna ortasha jóndeý jumystary júrgizilgen. Aýdandyq mańyzy bar 85 kóshedegi jóndeý jumystary qazan aıynda aıaqtalady. 32 jaıaý joldyń 26 shaqyrymy jańartyldy jáne jóndeldi. Bıylǵy jyly qala boıynsha 317 shaqyrym sý qubyrlary men 265 shaqyrym káriz jelilerin salýǵa jáne qaıta jasaýǵa qarjy bólindi. Uzyndyǵy 284 shaqyrym bolatyn jańa sý qubyrlary jelisin iske qosý – bıylǵy jyldyń kúzinde 175 myńnan astam adam turatyn 35 myń turǵyn úıdi sýmen qamtýdyń ortalyq júıesine qosýǵa múmkindik beredi.
"Shevchenko jáne Konaev kóshelerinde kólik qozǵalysy ashyldy, bulardaǵy relster alynyp tastaldy, aryq lotoktary tóselýde, jaıaý joldar, Orbıta yshqamaýdanynan Kókbazarǵa deıingi velodálizdiń bir bóligi bolyp tabylatyn velojoldar abattandyrylýda", – delingen habarda.
Kúrdeli jóndeý jumystary júrgen Baıtursynov kóshesi boıymen Tımırázev kóshesinen Abaı dańǵylyna deıingi joldar aýmaǵy da jóndelip, munda da kólik qozǵalysy ashyldy, trotýarlar men velojoldar kóriktendirilýde. Jandosov kóshesiniń uzyndyǵy 2,8 shaqyrym bolatyn ýchaskesindegi kúrdeli jóndeý jumystary da aıaqtalyp qaldy. Qazirgi kezde munda qozǵalys bóligi, jaıaý joldar men velojoldar abattandyrylyp jatyr.
Asqarov kóshesinen Ál-Farabı dańǵylynyń batys bóligindegi uzyndyǵy 3,5 shaqyrym bolatyn sý júıelerin qaıta jasalýda, sonyń arqasynda qyrkúıek aıynda 200 myńǵa jýyq qala turǵyny aýyz sýmen qamtamasyz etiledi. Qala ákimine qaıta jasalǵan ýchaskege qara asfált tóselgen soń, 30 tamyzda kólik qozǵalysynyń ashylatyndyǵy baıandaldy. Almaty ákimi Energetıka jáne komýnaldy sharýashylyq basqarmasynyń basshysyna jumysty jedeldetýdi ári sapaly atqarýdy, aýmaqty kóriktendirýge basa nazar aýdarýdy tapsyrdy.
Megapolıs basshysy Jubanov, Tóle bı, Mametova jáne Qazybek bı kósheleri boıyndaǵy jylý júıelerin qaıta jasaý jumystaryn da tekserdi.
"Tóle bı – úlken kólik legi bar magıstral kóshe. Munda uzyndyǵy 1,6 km bolatyn aýmaqta kúsheıtilgen rejımde jóndeý jumystary júrýde, tehnologıalyq proses tolyq saqtalyp otyr. Jumysty 25 qyrkúıekte aıaqtaýdy josparlap otyrmyz. Tóle bı boıymen Masanchıge burylatyn jerden Qarasaı batyrǵa deıingi aýmaqtaǵy jóndeý jumystaryn tamyz aıynda bitiremiz, sonymen qatar Mámetova men Qazybek bı kóshelerindegi jóndeý jumystaryn da osy merzimde tolyq aıaqtaımyz", –dedi "Almaty jylý júıesi" JSHS dırektory Erbolat Amanǵalıev.
Jalpy, jańa jylý maýsymyna deıin uzyndyǵy 32 shaqyrymnan asatyn jylý júıeleri jóndeýden ótedi, bul ótken jylmen salystyrǵanda 2,7 ese kóp. Jumystar jańasha ızolásıalanǵan qubyrlardy qoldaný arqyly júrýde, bulardyń paıdalaný merzimi 40 jyl.
Sonymen qatar qalada Fýrmanov, Abaı, Hmelnıskıı kóshelerin úńgileý jáne birneshe jolaıryqtaryn salý jumystary odan ári jalǵasady. Abaı dańǵyly boıyndaǵy Esentaı ózeni arqyly ótetin kópirde kúrdeli jóndeý jumystary júrip jatyr, onyń soltústik bóligindegi kólik qozǵalysy 1 qyrkúıekte, al ońtústigindegi kólik qozǵalysy 1 qazanda ashylatyn bolady.
