Búgin EKSPO-2017 Halyqaralyq mamandandyrylǵan kórmesi aıasynda Qyrǵyzstan Respýblıkasynyń Ulttyq kúni merekelendi dep habarlaıdy Qamshy.kz aqparat agenttigi.

Qazirgi kezde Qyrǵystanda strategıalyq jobalar negizinde 2018-2040 jyldarǵa arnalǵan turaqty damýdyń Ulttyq strategıasy ázirlenýde. Bul týraly Qyrǵyzstan Respýblıkasynyń vıse-premeri Cholpan Sýltanbekova málimdedi. Onyń aıtýynsha, jańa Ulttyq strategıaǵa sáıkes memleket aldynda negizgi úsh maqsat bar: halyqtyń ekonomıkalyq ál-aýqaty; áleýmettik amandyǵy; azamattardyń qaýipsiz jáne qolaıly ortasy. Jahandyq jylyný oryn alǵan zamanda «Bolashaq energıasy» taqyrybyndaǵy Kórmeniń mańyzy zor ekenin de tilge tıek etti.

«Qazaqstannyń 2012 jyly EKSPO-2017 kórmesin ótkizýge degen ótiniminiń jeńisi memlekettiń halyqaralyq joǵary bedeliniń taǵy bir dáleli boldy. Ekologıanyń qaıtarymsyz saldarynan qutylý úshin balamaly energetıkany damytýymyz qajet. Kórme aıasynda ozyq tájirıbemen almasýdyń jáne jańartylatyn energıa kózderin qoldaný salasynda yntymaqtastyq ornatýdyń mańyzy zor dep oılaımyn. Qyrǵyzstan energetıkanyń turaqty damýy úshin memlekettik qoldaý boıynsha álemdik baǵytty qoldaıdy. Energetıka – halyqtyń ómir súrý deńgeıine jáne ekonomıkanyń barlyq sektorlaryna tikeleı áser etetin strategıalyq sala. Atalǵan sala JİÓ 2,0% jáne ónerkásiptik óndiristiń 16%, respýblıkalyq búdjettiń 10% kirisin quraıdy», – dedi Qyrǵyzstan vıse-premeri.

Óz kezeginde Qazaqstan Respýblıkasyń Ulttyq ekonomıka mınıstri Tımýr Súleımenov memleketter arasyndaǵy dostyq qarym-qatynas ózara qurmet pen qyzyǵýshylyqqa negizdelgendigin jáne Qyrǵyzstannyń EKSPO-2017 kórmesine qatysýy – onyń aıqyn dáleli ekenin atap ótti.

«Eki el arasynda joǵary deńgeıde kelissózder men túrli jıyndar júrgizilýde. Qyrǵyzstannyń Ulttyq pavılonyn qurýda aıtarlyqtaı jumystar atqarylǵandyǵy aıqyn. QR Úkimeti atynan jáne jeke óz atymnan Qyrǵystanǵa qoldaý kórsetkeni úshin jáne Astana qalasyndaǵy EKSPO-2017 Halyqaralyq mamandandyrylǵan kórmesine qatysqany úshin alǵysymdy bildiremin», – dep qorytyndylady QR Ulttyq ekonomıka mınıstri.

Qyrǵyzstan pavılony Jibek joly plazasynda usynylǵan. Pavılondaǵy ınteraktıvti ekspozısıalar Kórme kelýshilerine Qyrǵyzstan Respýblıkasy týraly aqparat beredi, sondaı-aq, eldiń eksporttyq áleýetin damytýǵa, energetıkalyq qaýipsizdikpen qamtamasyz etýge baǵyttalǵan jobalar men sý energetıkasy salalaryndaǵy jetistikterimen tanystyrady.