Qazaqstan Respýblıkasy Ulttyq ulanynyń Bas qolbasshylyǵyna áıgili rok-mýzykant Vıktor Soıdyń ákesi – Robert Soı men Vıktor Soı atyndaǵy qordyń Qazaqstandaǵy tóraǵasy Leonıd Han keldi. Ulttyq ulan Bas qolbasshysynyń orynbasary general-maıor Muhametqalı Satovpen kezdesý barysynda belgili ánshiniń jas urpaqtyń áskerı-patrıottyq tárbıedegi róli sóz etildi dep habarlaıdy Qamshy.kz aqparat agenttigi QR Ulttyq ulanynyń baspasóz qyzmetine silteme jasap.
Qaraǵandy qalasynda ánshige arnalyp eskertkish ashylýymen elimizge joly túsken Robert Maksımovıch ýaqytynyń tyǵyzdyǵyna qaramastan Ulttyq ulannnyń Bas qolbasshylyǵyna shaqyrýyn úlken iltıpatpen qabyldady.
Kezdesý barysynda qadirmendi meıman shaqyrtýǵa qýanyshty ekenin aıtyp ótse, óz kezeginde Ulttyq ulannyń Bas tálimgeri onymen jeke kezdesý úlken mártebe ekenin tilge tıek etti.
Robert Soı Qyzylorda oblysynyń týmasy. Sol sebepti de elimiz oǵan etene tanys. «Qazaqstan – meniń Otanym» dep alańsyz aıtýy da osydan bolsa kerek. Astana men qazaq eliniń adam tanymastaı ózgerýi, qaryshtap alǵa damyp kele jatqany – ony qýantyp otyrǵanyn alǵa tartty. Áskerı is te Robert Maksımovıchke tańsyq emes eken. Lenıngrad qalasyndaǵy D.F.Ýstınov atyndaǵy Baltyq memlekettik tehnıkalyq ýnıversıtetiniń túlegi óziniń otstavkadaǵy «kapıtan-leıtenant» ekenin zor maqtanyshpen aıtyp ótti.
Robert Soıdy, ásirese, ulynyń Qazaqstandaǵy tanymaldylyǵy tań qaldyrdy. Al Qaraǵandydaǵy ulyna arnalǵan eskertkishtiń qoıylýy týrasynda oı bylaısha órbitti:
– Meniń oıymsha eskertkishterdi uly adamdarǵa qoıý kerek. Vıtka óz ónerimen sol umytylmas adamdardyń qasyna jaqyndady, – dep balasy úshin maqtanysh sezimin de jasyrmady. Vıktor Soıdyń esimin ulaqtap, onyń ónerdegi ornyn aıshyqtaı otyryp, eskertkish ornatqandary úshin Qazaqstanǵa sheksiz rızashylyǵyn bildirdi.
General-maıor Muhametqalı Satov óz kezeginde talaı býyn ókilderiniń «Kıno» tobynyń, onyń ishinde Vıktor Soıdyń óleńderimen óskenderiniń jáne de onyń daýsynyń erekshe este qalǵanyn sóz etti. Talant ıesiniń erte ólimi barsha mýzyka súıer qaýymnyń qabyrǵasyn qaıystyrǵany sózsiz. 27 jyldyń júzi ótse de, toptyń jankúıerleri osy oqıǵany júregine jaqyn qabyldaıtynyn jetkizdi.
Kezdesý sońynda Ulttyq ulannyń Bas tálimgeri qonaqtarǵa alǵysyn aıtyp, Vıktor Soıdyń ákesine ulandyqtardyń tarıhynan syr sherter «Quqyqtyq tártip áskeriniń jylnamasy» atty kitap pen áskerı basylymdardy syıǵa tartty. Vıktor Soı atyndaǵy qordyń tóraǵasy Leonıd Handy «Quqyqtyq tártip áskerine – 25 jyl» merekelik medalimen marapattady.
