Arakan shtatyndaǵy Mánma elinde áskerı shabýyldyń saldarynan úsh kún ishinde 2-3 myńǵa jýyq musylman óltirilip, 100 myń musylman úılerinen qýylǵan.

Bul týraly Musylman Rohıná Eýropalyq keńesiniń baspasóz hatshysy Anıta Shýg «Anadolý» agenttigine habarlaǵan dep jazady Qamshy.kz aqparat agenttigi.

Onyń aıtýynsha, sońǵy kúnderi Arakandaǵy áskerılerdiń ótken jyldarǵa qaraǵanda musylmandarǵa qarsy qylmystyq áreketteri jıilegen. «Jaǵdaı eshqashan dál osylaı ýshyǵyp kórmegen. Arakanda josparly túrde genosıd saıasaty júzege asyrylýda. Bir ǵana Saýgpara aýylynyń ózinde qantógis bolyp, sonyń saldarynan myńǵa jýyq musylman qyrylǵan. Bir bala aman qaldy», – dedi Shýg.

Jergilikti belsendiler málimeti men derekkózderge súıensek, Arakandaǵy qantógistiń artynda Mánma áskeri tur. Qazirgi ýaqytta úılerinen qashqan eki myńǵa jýyq musylman Mánma men Bangladeshtiń shekarasyn panalap júr. Anaýkpın men Náýngpıngı aýylyn býddıster jaýlap alǵan.

«Jergilikti turǵyndar kinásiz ekenderin aıtyp, ózderin aýyldardan evakýasıalaýdy suraǵan. Alaıda bılikten jaýap bolmady. Dál qazirgi ýaqytta aýyldarda júzge jýyq musylman qaldy jáne olardyń ómirine qaýip tónip tur», – dedi Shýg.

Budan buryn Arakan belsendisi, dáriger Mýhammed Eıýp han musylmandarǵa qarsy Mánma bıligi men býddıster tarapynan júzege asyp jatqan qantógisti toqtatýǵa BUU-dan kómek suraǵan edi. 2016 jyly bıliktiń qysymyna shydamaǵan jas musylmandar baqylaý pýnkterine shabýyl jasaǵan. Bul jaǵdaıdan soń Mánma bıligi baqylaý pýnkterin jaýyp, qaýipsizdik kúshteri Arakan shtatyndaǵy aýyldarǵa shabýyldap, jergilikti turǵyndardy óltirgen.

Eıýp hannyń aıtýynsha, 25 shilde kúni BUU úsh adamnan turatyn arnaıy komısıa bólgen eken, alaıda Mánma bıligi uıymnyń shtatqa ótýine jol bermegen. Sonyń saldarynan bılik 25 aýyldy qorshaýǵa alyp, sońy qantógiske ulasqan. BUU atalmysh jaǵdaıdy genosıd emes, etnıkalyq tazalaý dep ataǵan.

Islamofobıalyq kúıdegi Mánma bıligi 1940 jyldan bastap Arakan shtatyn musylmandardan tazalaý sharalaryn eń soraqy ádister arqyly júrgizip keledi.

Túrkıanyń vıse-premeri Bekır Bozdag Mánmada musylmandardyń ólimin qatań túrde aıyptady. «Mánmadaǵy turǵyndardyń azaptalyp jatqany Túrkıanyń alańdaýshylyǵyn týdyrdy. BUU men halyqaralyq uıymdar atalmysh jaǵdaıǵa kóz juma qaramaý kerek. Bul naǵyz – genosıd», – dedi Bozdag.  

2013 jyldyń 23 naýryzynda jarıalanǵan vıdeo. Mánmada meshitterdi órtep, musylmandardy óltirgen.