«Samuryq-Qazyna» UÁQ» AQ basqarma tóraǵasy Ómirzaq Shókeev «Qazatomónerkásip» UAK» AQ ujymyna ulttyq atom kompanıasynyń jańa basqarma tóraǵasy Ǵalymjan Oljauly Pirmatovty tanystyrdy. Ol buǵan deıin QR Ulttyq banki tóraǵasynyń orynbasary bolyp jumys istegen, dep habarlaıdy Qamshy.kz aqparat agenttigi Ulttyq kompanıanyń baspasóz qyzmetine silteme jasap.

Ǵ.Pirmatovtyń kandıdatýrasy kompanıanyń jalǵyz aksıoneri «Samuryq-Qazyna» UÁQ» AQ-nyń sheshimimen bekitilgen. Qor basshysy atap ótkendeı, Ǵ.Pirmatov atom ónerkásibi salasynda jumys tájirıbesi bar kásibı basshy.

2009-2011 jyldar aralyǵynda Ǵ. Pirmatov «Qazatomónerkásip» UAK» AQ-nyń ekonomıka jáne qarjy jónindegi vıse-prezıdenti boldy. 2011-2015 jyldary «Cameco Kazakhstan» taý-ken kompanıasyn basqardy.

«Ǵalymjan Pirmatov - atom ındýstrıasynda jaqsy tanymal joǵary bilikti maman. Ol salamen jaqyn tanys, sondyqtan kompanıa aldynda turǵan maqsat-mindetterdi tolyq oryndap, qazir salada júrip jatqan júıeli reformalardy sońyna jetkize alady», - dedi Ó. Shókeev.

Kezdesýge «Qazatomónerkásip» kompanıasynyń burynǵy basshysy, búginde QR Premer-mınıstriniń orynbasary Asqar Jumaǵalıev qatysty. Ol Qor basshylyǵy men ulttyq atom kompanıasynyń ujymyna birlese atqarǵan jemisti jumys úshin rızashylyǵyn aıtyp, jańa basshyǵa tabystar tiledi.

Eske sala ketsek, QR Prezıdentiniń 2017 jylǵy 29 tamyzdaǵy Jarlyǵymen Asqar Jumaǵalıev QR Premer-mınıstriniń orynbasary bolyp taǵaıyndalǵan bolatyn.