Qamshy.kz aqparattyq agenttigi derekkóziniń habarlaýynsha jaqyn kúnderi birneshe oblystyń ákimderi aýysyp qalýy múmkin.

Buǵan deıin, dálirek aıtsaq, 14 naýryzda Prezıdent Jarlyǵymen Aqmola, Qaraǵandy, Mańǵystaý jáne Soltústik Qazaqstan oblystarynyń ákimderi aýysqany belgili. Aqmola oblysyna Málik Mýrzalın, Qaraǵandyǵa Erlan Qoshanov, Mańǵystaýǵa Eraly Toǵjanov taǵaıyndalsa, Soltústik Qazaqstan oblysyna Qumar Aqsaqalov basshy bolyp barǵan edi.

Basqa birneshe oblys ákimderiniń laýazymdaryna taǵaıyndalǵanyna kóp bola qoıǵan joq. Degenmen, Almaty oblysy men Almaty qalasynyń, Qyzylorda, Jambyl oblystarynyń ákimderi aýysady eken degen sybys buǵan deıin de birneshe ret shyqqan bolatyn. Ol boljamdy da negizsiz deı almaısyz. Máselen, Jambyl oblysynyń basshysy Kárim Kókirekbaev bul laýazymǵa 2013 jyly jeltoqsan aıynda taǵaıyndaldy. Qyrymbek Kósherbaev ta osy jyly vıse-premerlikten Qyzylorda oblysyna ákim bolyp bardy. Amandyq Batalov Almaty oblysynyń tizginin 2014 jyly ustasa, Baýyrjan Baıbektiń Almatyǵa basshy bolǵanyna da eki jyldan asty. Bul qatarǵa Aqtóbe oblysynyń ákimi Berdibek Saparbaevty da qosýǵa bolady.

Elbasynyń qatysýymen ótken sońǵy jıyndar men eldegi qalyptasyp otyrǵan saıası, ekonomıkalyq ahýalǵa qarap kadrlyq aýys-túıister tek oblys ákimderimen shektelmeýi múmkin degen de boljam jasaýǵa bolady. Budan burynyraq Qamshy.kz aqparat agenttigi «Astana EKSPO-2017» basshysy Ahmetjan Esimovtyń premerlik kresloǵa jaıǵasýy múmkin ekenin jazǵan edi. Odan bólek, taıaý kúnderi úkimettiń basqa da músheleri aýysyp jatsa tań qalyp kerek emes. Máselen, syrttan ınvestısıalar tartýǵa jaýapty Investısıalar jáne damý mınıstrliginiń jumysyna qatysty osyǵan deıin az syn aıtylǵan joq. Mınıstrlikten bólek osy baǵyttaǵy jumystarmen aınalysatyn arnaıy qurylǵanymen, elge aǵylyp jatqan ınvestorlardy kóre almadyq. Bul olqylyqtar Elbasynyń jańa kadrlyq sheshimder qabyldaýyna sebep bolýy ábden múmkin.