Qazaqstan KHDR boıynsha BUU Qaýipsizdik Keńesiniń jańa rezolúsıasyn quptady, dep jazady Qamshy.kz aqparat agenttigi. Rezolúsıa 11 qyrkúıekte Qazaqstandy qosa BUU QK-niń barlyq múshelerimen KHDR-dyń 3 qyrkúıekte ótkizilgen altynshy jáne eń qýatty ıadrolyq synaqqa jaýap retinde biraýyzdan qabyldandy.

«Biz KHDR Qaýipsizdik Keńesiniń sheshimderin túbegeıli buza otyryp, elimizge jáne onyń basshylyǵyna eleýli saldarǵa ákeletinin ókinishpen atap ótemiz», – dep málimdedi Qazaqstannyń BUU janyndaǵy Turaqty ókili Qaırat Omarov. Ol Phenánnyń jahandyq úndeýdi estip, estilik pen dıalog jolyn tańdaıtynyna úmit bildirdi.

«Jetildirilgen balıstıkalyq zymyrandardy ushyrý serıasynan keıin KHDR ǵalamshardy óziniń sumdyq ıadrolyq synaqtarymen solqyldatty. Soltústik Koreıanyń jaýapsyz saıasaty ıadrolyq qarýdy taratpaý jónindegi jahandyq úderiske kesirin tıgizip, ǵalamshardyń ıadrolyq qarýsyz bolashaǵyn qamtamasyz etý boıynsha ujymdyq úlesterge nuqstan keltiredi», – dep atap ótildi málimdemede. Qazaqstan ıadrolyq synaqtardyń saldarynan shyndap zardap shekken el retinde osyndaı óreskel áreketterge qarsylyǵyn bildirip, HHİ ǵasyrda ıadrolyq synaqtar úshin oryn bolmaýy tıis ekenindigine óziniń berik senimin bildiredi. Óziniń túbegeıli ustanymyna súıene otyryp, álem Soltústik Koreıanyń ıadrolyq baǵdarlamasyn qabyldamaıtynyn Phenánǵa esine túsiredi degen úmitte, Qazaqstan jańa qararǵa qoldaý kórsetti.

2375 (2017) Qarar Soltústik koreıalyq toqyma buıymdaryn satyp alýǵa, oǵan gaz kondensatyn satýǵa tolyq tyıym salady, sondaı-aq Soltústik Koreıanyń porttaryna kiretin jáne porttardan shyǵatyn júk kemelerin tekserýdi kózdeıdi. Budan basqa, sanksıalar týraly qujat KHDR-ǵa munaı ónimderin jetkizýge shekteý qoıdy – osy jyldyń aıaǵyna deıin 500 myń barelden jáne 2018 jyldyń qańtarynan bastap jylyna 2 mln. barelden aspaýy tıis. Burynǵy sanksıalarmen birge qabyldanǵan sharalar dál qazir Soltústik Koreıanyń eksportyn 90%-ke deıin tómendetýge baǵyttalǵan jáne óziniń ıadrolyq baǵdarlamasyn damytýdy jalǵastyrý úshin eldiń qarjy múmkindikterin shyndap shekteıdi.

Qaýipsizdik Keńesiniń músheleri sanksıalardy kúsheıtýmen qatar, Koreı túbegindegi beıbitshilik pen turaqtylyqty saqtaýdyń mańyzdylyǵyn rastap, jaǵdaıdy beıbit jáne jan-jaqty retteýdiń saıası jáne dıplomatıalyq ádisterine beıildiligin bildirdi.

Iadrolyq qarýdan azat álemge qol jetkizý – bıylǵy qańtar aıynda Qazaqstan Prezıdenti Nursultan Nazarbaevtyń BUU Qaýipsizdik Keńesine saıası úndeýinde jarıalanǵan birinshi basymdyq bolyp tabylady. «Sonymen qatar, bul turǵyda osy másele boıynsha kópjaqty kelissózder úderisin dereý qalpyna keltirýin qoldap, Koreı túbegindegi ıadrolyq qarý máselesin jedel jáne syndarly sheshýdi Qazaqstan Respýblıkasy mańyzdy mindet dep sanaıdy. Eń durysy – Qazaqstan BUU-ǵa múshe-memleketterdiń barlyǵyn, ásirese Qaýipsizdik Keńesiniń turaqty múshelerin, 2045 jyly BUU-nyń 100-jyldyǵyna deıin álemdi ıadrolyq qarýdan aryltýǵa shaqyrady»,- dep Memleket basshysynyń qańtardaǵy úndeýinde atap ótilgen edi.